جنیوا، 31 جولائی(اے پی پی): سوئٹزرلینڈ کے دارالحکومت جنیوا سے موصول ہونے والی اطلاعات کے مطابق جنیوا میں منعقدہ چھٹی اسپیکرز کانفرنس کے موقع پر اسپیکر قومی اسمبلی سردار ایاز صادق اور برطانوی ہاؤس آف کامنز کے اسپیکر سر لنزے ہوئل کے درمیان ملاقات ہوئی ہے۔ملاقات میں دونوں رہنماؤں نے دوطرفہ پارلیمانی تعاون، جمہوری اقدار کے فروغ اور باہمی دلچسپی کے امور پر تفصیلی تبادلہ خیال کیا۔
اس موقع پر اسپیکر سردار ایاز صادق نے کہا کہ پاکستان، برطانیہ کے ساتھ اپنے دیرینہ، تاریخی اور خوشگوار تعلقات کو بے حد اہمیت دیتا ہے۔ انہوں نے دونوں ممالک کی پارلیمانوں کے مابین روابط کو مزید فروغ دینے کی ضرورت پر زور دیا تاکہ عوامی سطح پر تعلقات کو مزید مضبوط بنایا جا سکے۔انہوں نے کہا کہ پاکستان کی قومی اسمبلی اور برطانیہ کی ہاؤس آف کامنز کے درمیان پارلیمانی تعاون سے نہ صرف جمہوری روایات کو فروغ ملے گا بلکہ دوطرفہ تعلقات میں بھی نئی جہتیں پیدا ہوں گی۔
اسپیکر قومی اسمبلی نے اس بات پر بھی زور دیا کہ برطانیہ میں مقیم پاکستانی کمیونٹی دونوں ممالک کے درمیان ایک مضبوط پل کا کردار ادا کر رہی ہے، جس کے ذریعے ثقافتی، تعلیمی اور تجارتی شعبوں میں تعاون کو مزید فروغ حاصل ہو سکتا ہے۔
اسپیکر سردار ایاز صادق نے ملاقات کے دوران مقبوضہ جموں و کشمیر کی صورتحال پر بھی روشنی ڈالی اور کہا کہ بھارت کی جانب سے انسانی حقوق کی مسلسل خلاف ورزیاں بین الاقوامی قوانین اور انسانی اقدار کے منافی ہیں۔ انہوں نے کہا کہ مسئلہ کشمیر کا حل اقوام متحدہ کی سلامتی کونسل کی قراردادوں کے مطابق ناگزیر ہے تاکہ خطے میں پائیدار امن قائم ہو سکے۔
دونوں اسپیکرز نے اس بات پر اتفاق کیا کہ دنیا کو درپیش چیلنجز، خصوصاً جمہوری انحطاط، انسانی حقوق کی خلاف ورزیاں، اور عالمی امن و سلامتی کے مسائل کے حل کے لیے پارلیمانی سفارتکاری کا فروغ وقت کی اہم ضرورت ہے۔دونوں رہنماؤں نے جمہوری اقدار کے تحفظ اور پارلیمانی تعاون کو مزید وسعت دینے کے مشترکہ عزم کا اعادہ کیا۔
