اسلام آباد، 24 جولائی (اے پی پی): وزیرِ اعظم محمد شہباز شریف نے سول سروسز کو جدید خطوط پر استوار کرنے، اسٹرکچر کی بہتری اور عصری تقاضوں سے ہم آہنگ بنانے کے لیے وزیرِ منصوبہ بندی احسن اقبال کی سربراہی میں اعلیٰ سطحی کمیٹی قائم کردی ہے۔
وزیرِ اعظم کی ہدایت پر کمیٹی ایک ماہ میں تفصیلی مشاورت کے بعد اصلاحات پر مبنی جامع سفارشات پیش کرے گی۔ کمیٹی کو ہدایت دی گئی ہے کہ وہ میرٹ پر بہترین ٹیلنٹ کی بھرتی، کارکردگی کے لیے مخصوص اہداف پر مبنی کے پی آئیز، اے سی آر نظام کی بہتری اور اس کا مؤثر متبادل پیش کرنے کے حوالے سے جامع سفارشات مرتب کرے۔
مزید برآں، جدید ٹیکنالوجی اور نظام کی روشنی میں افسران کی استعداد کار بڑھانے کے لیے بھی لائحہ عمل ان سفارشات کا حصہ ہوگا۔ وزیرِ اعظم نے زور دیا کہ ایسی سفارشات مرتب کی جائیں جو گورننس کی بہتری، سول سروسز کو متواتر جدید تقاضوں سے ہم آہنگ کرنے اور پائیدار نظام کی بنیاد بنیں۔
وزیرِ اعظم نے واضح کیا کہ سول سروسز میں ایسی اصلاحات حکومت کی اولین ترجیح ہیں جو عام آدمی کی زندگی کو آسان اور باوقار بنانے میں معاون ثابت ہوں۔
یہ ہدایات آج اسلام آباد میں منعقدہ ایک اعلیٰ سطحی اجلاس کے دوران دی گئیں جس کی صدارت وزیرِ اعظم نے خود کی۔ اجلاس میں وفاقی وزراء احسن اقبال، اعظم نذیر تارڑ، احد خان چیمہ، سردار اویس لغاری، علی پرویز ملک، مشیرِ وزیرِ اعظم رانا ثناء اللہ، وزیرِ مملکت بلال اظہر کیانی، معاونینِ خصوصی ہارون اختر، طارق باجوہ، ڈاکٹر جہانزیب خان، سیکریٹری ایپکس کمیٹی ایس آئی ایف سی اور دیگر اعلیٰ حکام نے شرکت کی۔
اجلاس کے دوران سول سروسز اصلاحات کے حوالے سے تفصیلی بریفنگ دی گئی۔ بتایا گیا کہ بھرتی، تربیت، کارکردگی کے جائزے، تنخواہوں اور ترقی سے متعلق مختلف پہلوؤں پر مشاورت جاری ہے۔ اجلاس میں خطے کے دیگر ممالک کی سول سروس اصلاحات کا تقابلی جائزہ بھی پیش کیا گیا۔
وزیرِ اعظم نے ہدایت کی کہ تمام اسٹیک ہولڈرز سے مشاورت کے بعد اصلاحاتی سفارشات کو جلد از جلد حتمی شکل دی جائے تاکہ سول سروسز کو ایک مؤثر، شفاف اور جدید نظام میں تبدیل کیا جا سکے۔
