اسلام آباد، 10 جولائی (اے پی پی): وزیراعظم محمد شہباز شریف کی زیر صدارت نیشنل ٹیرف کمیشن کی کارکردگی پر جائزہ اجلاس منعقد ہوا ،جس میں وزیراعظم نے کمیشن کی قانونی، انتظامی اور دیگر ادارہ جاتی اختیارات و فرائض کی ہنگامی بنیادوں پر تنظیم نو کی ہدایت جاری کی۔
وزیراعظم نے نیشنل ٹیرف کمیشن کی حالیہ کارکردگی کی تھرڈ پارٹی نظرثانی کرانے کی ہدایت کرتے ہوئے کہا کہ اس کا مقصد کمیشن کو مزید فعال اور مؤثر بنانا ہے۔ ان کا کہنا تھا کہ نئی ٹیرف رجیم کے تقاضوں کی بخوبی انجام دہی کے لیے کمیشن کی جدید خطوط پر تنظیم نو ناگزیر ہے۔
وزیراعظم نے زور دیا کہ نیشنل ٹیرف کمیشن کے پاس ملکی کاروبار، درآمدات و برآمدات اور مارکیٹ کے زمینی حقائق اکٹھے کرنے کی مؤثر استعداد ہونی چاہیے تاکہ پالیسی سازی میں بہتر فیصلے کیے جا سکیں۔ انہوں نے کہا کہ کمیشن کی خودکار اور مؤثر تحقیقی استعداد ملکی کاروباری مسائل کے حل میں کلیدی کردار ادا کر سکتی ہے۔
وزیراعظم نے نیشنل ٹیرف کمیشن کے اپیلیٹ ٹریبونل کو فوری طور پر فعال کرنے کی ہدایت دیتے ہوئے کہا کہ حکومت کمیشن کی تربیت و وسائل کی کمی کو دور کرنے اور اس کے کام کو جدید تقاضوں سے ہم آہنگ کرنے کے لیے پرعزم ہے۔ وزیراعظم نے ہدایت کی کہ جاری کردہ نئی ہدایات پر پیش رفت کی بریفنگ اگلے ماہ پیش کی جائے۔
اجلاس میں وفاقی وزیر برائے موسمیاتی تبدیلی ڈاکٹر مصدق ملک، وفاقی وزیر خزانہ محمد اورنگزیب، وفاقی وزیر اقتصادی امور احد خان چیمہ، وفاقی وزیر برائے پیٹرولیم علی پرویز ملک اور متعلقہ اعلیٰ سرکاری عہدے داران نے شرکت کی۔
