لاہور، 6 جولائی (اے پی پی): وزیراعلیٰ پنجاب مریم نواز شریف کی ہدایات پر کابینہ کمیٹی برائے امن و امان نے لاہور میں پنجاب سیف سٹیز اتھارٹی کا دورہ کیا۔
اس موقع پر کمیٹی کے چیئرمین و وزیر صحت خواجہ سلمان رفیق، وزیر ہاؤسنگ بلال یاسین اور وزیر خزانہ مجتبیٰ شجاع الرحمن موجود تھے۔ دورے کے دوران سیکرٹری داخلہ پنجاب ڈاکٹر احمد جاوید قاضی، آئی جی پنجاب ڈاکٹر عثمان انور، ڈی آئی جی سپیشل برانچ خرم شہزاد اور کمشنر لاہور زید بن مقصود بھی ہمراہ تھے۔
کمیٹی نے مانیٹرنگ ہال سے پنجاب کے مختلف اضلاع میں جاری عاشورہ کے مرکزی جلوسوں کی لائیو نگرانی کی۔ ایم ڈی سیف سٹیز اتھارٹی محمد احسن یونس نے عاشورہ کے سیکیورٹی انتظامات کے حوالے سے تفصیلی بریفنگ دی۔ انہوں نے بتایا کہ سیف سٹیز اتھارٹی پنجاب بھر میں نصب 22 ہزار کیمروں کی مدد سے عاشورہ کی مجالس و جلوسوں کی مانیٹرنگ کر رہی ہے۔
اس موقع پر وزیر صحت خواجہ سلمان رفیق نے کہا کہ لاہور سمیت پنجاب بھر میں عاشورہ مذہبی عقیدت و احترام کے ساتھ گزر رہا ہے اور قانون نافذ کرنے والے اداروں کی انتھک محنت سے صوبے میں امن کی فضا قائم ہے۔ انہوں نے مزید کہا کہ عشرہ محرم کے دوران کابینہ کمیٹی نے انتظامات کی خود نگرانی کرتے ہوئے فیلڈ میں وقت گزارا۔
وزیر ہاؤسنگ بلال یاسین نے بتایا کہ 10 محرم کے دن پنجاب میں 2845 جلوس اور 2502 مجالس کی مکمل مانیٹرنگ کی جا رہی ہے جبکہ امن و امان کو یقینی بنانے کے لیے پولیس اور انتظامیہ فیلڈ میں فعال کردار ادا کر رہی ہے۔
وزیر خزانہ مجتبیٰ شجاع الرحمن نے بتایا کہ محکمہ داخلہ کا سائبر پٹرولنگ سیل فرقہ وارانہ مواد اور نفرت انگیز پوسٹس کے خلاف زیرو ٹالرنس پالیسی پر عمل کر رہا ہے۔ انہوں نے کہا کہ سوشل میڈیا پر فرقہ واریت پھیلانے والے 1834 اکاؤنٹس کی نشاندہی کی گئی ہے، جن میں سے 185 افراد کو گرفتار کیا جا چکا ہے۔
سیکرٹری داخلہ پنجاب ڈاکٹر احمد جاوید قاضی نے اس عزم کا اعادہ کیا کہ تمام عزاداروں کی بحفاظت واپسی تک سیکیورٹی پر معمور عملہ پوری طرح الرٹ اور مستعد رہے گا۔
