اسلام آباد، 09 جولائی، (اے پی پی):وزیرِ اعظم محمد شہباز شریف کی قیادت میں ملکی ترقی کے سفر پراعتماد کا اظہار،خیبرپختونخوا سے ثمرہارون بلور کی مسلم لیگ ن میں شمولیت کا اعلان کر دیا۔
وزیراعظم محمد شہباز شریف سے ثمرہارون بلور،سعیدہ جمشید اور جمشید مہمند نے اسلام آباد میں ملاقات کی۔
ملاقات میں مشیر وزیرِاعظم رانا ثناء اللہ،وفاقی وزیرامورِ گلگت بلتستان و کشمیر اور صوبائی صدرمسلم لیگ ن خیبر پختونخوا انجینئیر امیر مقام، وفاقی وزیر مذہبی امور سردار یوسف،وزیرِ برائے پبلک افیئرز یونٹ رانا مبشر اور مسلم لیگ ن کے صوبائی جنرل سیکریٹری مرتضی جاوید عباسی بھی تھے۔
اس موقع پر ثمر ہارون بلور نے ملکی معاشی استحکام،عوام دوست بجٹ اور ملکی معاشی ترقی کی درست سمت پر وزیرِاعظم کی قیادت کو خراج تحسین پیش کیا اور کہا چاہتی ہوں کہ وفاق اور پنجاب کی طرز پر خیبرپختونخوا بھی ترقی کی راہ پر گامزن ہو۔
ثمرہارون بلور نے وزیرِاعظم اور پارٹی قیادت کے ساتھ مل کر خیبرپختونخوا کے عوام کی خدمت کا اعادہ کیا۔
وزیرِ اعظم نے اس موقع پر ثمرہارون کا پارٹی میں خیر مقدم، مستقبل کیلئے نیک خواہشات کا اظہار کیا اور ثمر ہارون بلور کےعوامی خدمت کے جذبے کی تعریف اور بلورخاندان کی قربانیوں اور خدمات کا اعتراف کیا۔
