اسلام آباد، 6 اگست (اے پی پی): صدرِ مملکت آصف علی زرداری سے عمان کے سفیر فہد سلیمان خلف الخاروصی نے ایوانِ صدر میں ملاقات کی۔ ملاقات میں تجارت، سرمایہ کاری اور توانائی کے شعبوں میں تعاون بڑھانے پر گفتگو ہوئی۔
فریقین نے پاکستان اور عمان کے درمیان تاریخی و برادرانہ تعلقات کو مزید مستحکم کرنے کے عزم کا اعادہ کیا۔ صدر مملکت نے کہا کہ دونوں ممالک کے تعلقات مشترکہ مذہب، ثقافت اور اقدار پر مبنی ہیں اور ان میں اقتصادی و تجارتی تعاون کو مزید وسعت دینے کی ضرورت ہے۔
صدرِ مملکت نے آئی ٹی، تعمیرات، صحت، فوڈ سیکیورٹی اور توانائی کے شعبوں میں سرمایہ کاری کے وسیع امکانات پر زور دیا۔ انہوں نے کہا کہ حکومتی و نجی شعبے کے قریبی روابط سے باہمی تعاون کو فروغ حاصل ہوگا۔
صدر آصف علی زرداری نے پاکستان کی سلامتی کونسل کی غیر مستقل رکنیت کے لیے عمان کی حمایت پر شکریہ بھی ادا کیا۔
