اسلام آباد، 03 اگست (اے پی پی):
صدرِ مملکت آصف علی زرداری اور اسلامی جمہوریہ ایران کے صدر ڈاکٹر مسعود پزشکیان کے درمیان اہم ملاقات ہوئی، جس میں دونوں رہنماؤں نے پاکستان اور ایران کے درمیان دو طرفہ تعاون کو مزید وسعت دینے کے عزم کا اعادہ کیا۔
صدر زرداری نے صدر پزشکیان کا پُرتپاک خیرمقدم کرتے ہوئے کہا کہ پاکستان اور ایران کے تعلقات مشترکہ مذہب، ثقافت اور باہمی احترام پر مبنی ہیں۔ دونوں رہنماؤں نے وسیع اور باہمی فائدے کے حامل شعبوں میں تعاون بڑھانے کی ضرورت پر زور دیا، اور علاقائی و عالمی امور پر تفصیلی تبادلہ خیال کیا۔
صدر زرداری نے صدر پزشکیان کا پُرتپاک خیرمقدم کرتے ہوئے کہا کہ پاکستان اور ایران کے تعلقات مشترکہ مذہب، ثقافت اور باہمی احترام پر مبنی ہیں۔ دونوں رہنماؤں نے وسیع اور باہمی فائدے کے حامل شعبوں میں تعاون بڑھانے کی ضرورت پر زور دیا، اور علاقائی و عالمی امور پر تفصیلی تبادلہ خیال کیا۔
ملاقات میں خطے میں امن و استحکام کے لیے مربوط سفارتی کوششوں پر اتفاق کیا گیا۔
صدر زرداری نے ایران کے اصولی مؤقف کو سراہتے ہوئے تہران کی مستقل حمایت اور مشکل وقتوں میں ایران کی یکجہتی پر شکریہ ادا کیا۔انہوں نے کہا کہ پاکستان اور ایران خطے کے پُرامن اور خوشحال مستقبل کے لیے مل کر کام جاری رکھیں گے۔
صدر زرداری نے ایران کے خلاف اسرائیلی جارحیت کی شدید مذمت کرتے ہوئے 12 روزہ جنگ کے دوران ایرانی قوم کی جرات اور اتحاد کو خراجِ تحسین پیش کیا۔
صدر مسعود پزشکیان نے بھی 12 روزہ جنگ کے دوران پاکستان کی قیادت اور عوام کی حمایت کا شکریہ ادا کرتے ہوئے کہا کہ پاکستان نے کشیدگی میں کمی اور تنازعات کے پُرامن حل کے لیے تعمیری کردار ادا کیا۔ انہوں نےاس امید کا اظہار کیا کہ ان کا یہ دورہ پاکستان و ایران کے برادرانہ تعلقات کو مزید مستحکم کرے گا۔
ملاقات خوشگوار ماحول میں اختتام پذیر ہوئی، اور دونوں ممالک نے مل کر خطے میں امن، ترقی اور خوشحالی کے لیے کوششیں جاری رکھنے کے عزم کا اظہار کیا۔
