کراچی، 01 اگست (اے پی پی): صدرِ پاکستان آصف علی زرداری سے وزیرِ اعلیٰ بلوچستان میر سرفراز بگٹی نے بلاول ہاؤس کراچی میں ملاقات کی۔ ملاقات میں بلوچستان کی ترقی، امن و امان اور مجموعی سیاسی صورتحال پر تبادلۂ خیال کیا گیا۔
وزیرِ اعلیٰ نے صدرِ مملکت کو صوبے میں امن و امان کی صورتحال اور جاری ترقیاتی منصوبوں سے متعلق تفصیلی بریفنگ دی۔
صدر آصف علی زرداری نے بلوچستان میں امن و امان مزید بہتر بنانے کی ہدایت دیتے ہوئے کہا کہ عوامی فلاح، بنیادی سہولتوں کی فراہمی اور ترقیاتی منصوبوں کی بروقت تکمیل کو یقینی بنایا جائے۔
انہوں نے زور دیا کہ بلوچستان کے عوام کا معیارِ زندگی بہتر بنانے کے لیے مؤثر اور پائیدار اقدامات کیے جائیں۔
