لاہور، 30 اگست (اے پی پی): صوبائی وزیر صنعت و تجارت چوہدری شافع حسین نے ضلع گجرات کے سیلاب متاثرہ علاقوں کا تفصیلی دورہ کیا۔ صوبائی وزیر نے فلڈ ریلیف کیمپوں میں جاری امدادی سرگرمیوں کا جائزہ لیا اور متاثرہ خاندانوں سے ملاقات کرکے ان میں امدادی اشیاء تقسیم کیں۔ چوہدری شافع حسین کشتی کے ذریعے دریائے چناب میں پانی کے بہاؤ کا بھی معائنہ کیا۔ اس موقع پر عل پور میں متاثرین سے خطاب کرتے ہوئے صوبائی وزیر نے کہا کہ پنجاب کو تاریخ کے بدترین سیلاب کا سامنا ہے تاہم بارشوں اور سیلاب سے متاثرہ افراد کی مدد کے لیے پوری حکومتی مشینری فیلڈ میں موجود ہے۔ انہوں نے کہا کہ آزمائش کی اس گھڑی میں حکومت متاثرین کے ساتھ کھڑی ہے اور ہر متاثرہ خاندان تک امداد پہنچائی جائے گی۔ بارشوں اور سیلاب سے تباہ شدہ انفراسٹرکچر کی بحالی کا کام جلد شروع کیا جائے گا جبکہ نقصانات کے تخمینے کے لیے سروے کا آغاز کیا جا رہا ہے، جس کی روشنی میں وزیراعلیٰ پنجاب ریلیف پیکج کا اعلان کریں گی۔ صوبائی وزیر صنعت و تجارت نے مزید کہا کہ موسمیاتی تبدیلیوں کے اثرات سے بچنے کے لیے شجرکاری اور چھوٹے ڈیموں کی تعمیر وقت کی ضرورت ہے۔ گجرات میں اربوں روپے کے ترقیاتی منصوبے مکمل کیے جائیں گے اور ترقیاتی فنڈز کے شفاف استعمال کو یقینی بنایا جائے گا۔ انہوں نے کہا کہ ضلع میں تعلیمی اداروں کی اپ گریڈیشن بھی کی جائے گی۔ سیلاب متاثرین نے مشکل کی گھڑی میں حکومت کے ساتھ کھڑے ہونے پر چوہدری شافع حسین اور مسلم لیگ کی قیادت کا شکریہ ادا کیا۔ اس موقع پر مسلم لیگ گجرات سٹی کے صدر علی ابرار جوڑا، یوتھ ونگ کے صدر کامران عثمانی، انتظامی اور پولیس افسران بھی صوبائی وزیر کے ہمراہ تھے۔
