اسلام آباد،26 اگست (اے پی پی): وزیراعظم محمد شہباز شریف نے کہا ہے کہ معاشی اور تجارتی اصلاحات کے ذریعے کاروبار اور سرمایہ کاری میں اضافہ کرنا حکومت کی اولین ترجیحات میں شامل ہے۔
ان خیالات کا اظہار کسٹم کے جانچ پڑتال اور تخمینہ کے نظام کو شفاف بنانے کے لئے کئے جانے والے اقدامات سے متعلق جائزہ اجلاس کی صدارت کرتے ہوئے کیا۔ وزیراعظم نے کہا کہ کسٹم کے جانچ پڑتال اور تخمینہ کے نظام کو جدید ٹیکنالوجی سے ہم آہنگ اور فیس لیس کر کے شفافیت کو یقینی بنایا جائے۔
وزیراعظم نے خصوصی ہدایت کی کہ کسٹم کے نظام کی بہتری اور جدت کا مقصد برآمدات اور درآمدات سے منسلک کاروباری حضرات کو سہولت پہنچانے کے ساتھ ملکی ریونیو میں اضافہ کرنا ہے ۔
وزیر اعظم نے کہا کہ کسٹم نظام کی اصلاحات کے موثر نفاذ کے لیے تمام متعلقہ ادارے باہمی ہم آہنگی اور مربوط حکمت عملی کے تحت کام کریں۔ کسٹم نظام کی اصلاحات میں بین الاقوامی سطح پر کی جانے والی قابل عمل اور بہترین حکمت عملی سے ہر ممکن استفادہ حاصل کیا جائے۔ ان کا مزید کہنا تھا کہ معاشی ترقی و خوشحالی اور تجارت و سرمایہ کاری میں بہتری کی منزل کے حصول کے لیے حکومت اور تمام متعلقہ ادارے پرعزم ہیں۔
وزیراعظم نے ہدایت کی کہپورٹس پر بڑھتی ہوئی کارگو اور اس کے جلد از جلد ترسیل کے لئے ایسی منظم منصوبہ بندی کی جائے تاکہ سامان جلد از جلد بندرگاہ سے اپنی منزل کی جانب رواں دواں ہو۔
وزیراعظم نے کسٹم حکام اور تمام متعلقہ اداروں کو اصلاحات کے جلد، مکمل اور موثر نفاذ کے لیے ضروری ہدایات جاری کی۔ وزیراعظم نے کسٹم نظام میں شفافیت، ٹیکس کلیکشن میں اضافہ اور کاروباری حضرات کو سہولت جیسے اہم پہلوؤں کے لیے تمام ضروری اقدامات کرنے کی ہدایت کی۔
اجلاس میں وزیراعظم کو کسٹم کے جانچ پڑتال اور تخمینہ میں کیے جانے والے اب تک کے اقدامات سے آگاہ کیا گیا۔ اجلاس میں بتایا گیا کہ مصنوعی ذہانت پر مبنی رسک مینجمنٹ سسٹم بھی جلد فعال ہو جائے گا-
اجلاس کو بتایا گیا کہ مصنوعی ذہانت کے استعمال سے کسٹم کلیرنس میں درکار وقت کم سے کم ہوتا جا رہا ہے جبکہ حکومت کی سمگلنگ کے خلاف موثر کاروائیوں سے اشیاء کی غیر قانونی ترسیل میں کمی اور اشیاء کی باقاعدہ قانونی نظام کے تحت کسٹم کلیئرنس کی تعداد میں اضافہ ہوا ہے۔
