اسلام آباد، 28 اگست 2025 (اے پی پی): وزیراعظم محمد شہباز شریف پنجاب کے سیلاب سے متاثرہ علاقوں کے دورے پر روانہ ہوگئے۔ روانگی سے قبل اور فضائی جائزے کے دوران چیئرمین این ڈی ایم اے لیفٹیننٹ جنرل انعام حیدر نے ملک میں مجموعی سیلابی صورتحال پر وزیراعظم کو تفصیلی بریفنگ دی۔
وزیراعظم کو پنجاب کے دریاؤں میں طغیانی اور زیر آب علاقوں میں جاری ریسکیو و ریلیف آپریشن کے بارے میں آگاہ کیا گیا۔ وزیر اعلیٰ پنجاب مریم نواز شریف بھی لاہور سے وزیراعظم کے ہمراہ نارووال روانہ ہوئیں، جہاں دورانِ سفر سیلابی صورتحال پر گفتگو ہوئی اور چیئرمین این ڈی ایم اے نے مزید بریفنگ دی۔
وزیراعظم شہباز شریف نے فضائی جائزے کے دوران سیلابی صورتحال سے نمٹنے اور ریلیف آپریشن میں تمام ضروری اقدامات کرنے کی ہدایات جاری کیں۔ نارووال پہنچنے پر وزیراعظم اور وزیر اعلیٰ کو سیلابی صورتحال پر مزید تفصیلی بریفنگ دی جائے گی۔
