اسلام آباد، 29اگست(اے پی پی):وزیراعظم کے معاونِ خصوصی برائے صنعت و پیداوار، ہارون اختر خان نے چینی کمپنی ہواگوان کے چیف ایگزیکٹو آفیسر سے ملاقات کی، جس میں الیکٹرک گاڑیوں، لیتھیم بیٹریز، روبوٹکس اور ڈرون ٹیکنالوجی میں تعاون کے مواقع پر تبادلہ خیال کیا گیا۔
وزیراعظم شہباز شریف کے وژن کو اجاگر کرتے ہوئے ہارون اختر خان نے کہا کہ “الیکٹرک گاڑیاں ہی مستقبل ہیں۔ انہوں نے کہا کہ الیکٹرک گاڑیوں کو اپنانا ماحول کے تحفظ اور ملک کے تیل کے درآمدی بل میں کمی کے لیے ناگزیر ہے۔لیتھیم بیٹریز کی اہمیت پر بات کرتے ہوئے انہوں نے کہا کہ ان میں توانائی ذخیرہ کرنے کی بے پناہ صلاحیت ہے اور یہ مستقبل کے توانائی منظرنامے میں اہم کردار ادا کریں گی۔
ہواگوان کمپنی کے سی ای او نے بتایا کہ ان کی کمپنی زرعی مقاصد کے لیے لیتھیم بیٹریز پر چلنے والے ڈرونز بھی تیار کر رہی ہے۔ وزیراعظم کے معاونِ خصوصی ہارون اختر خان نے اس موقع پر کہا کہ دنیا بھر میں روبوٹکس اور ڈرونز کا استعمال شعبہ صحت، زراعت اور روزمرہ زندگی میں تیزی سے بڑھ رہا ہے۔انہوں نے مزید کہا کہ ڈرونز سیلاب اور دیگر قدرتی آفات کے دوران ریسکیو اور ریلیف آپریشنز میں نہایت مددگار ثابت ہو سکتے ہیں۔
ہارون اختر خان نے اس بات پر زور دیا کہ وزیراعظم شہباز شریف کا آئندہ دورۂ چین دونوں ممالک کے تعلقات کو مزید مضبوط کرے گا۔ انہوں نے کہا کہ چین کے ساتھ مشترکہ منصوبے اور بزنس ٹو بزنس تعاون اقتصادی شراکت داری میں سنگِ میل ثابت ہوں گے۔
آخر میں انہوں نے کہا کہ یہ دورہ سرمایہ کاری، بزنس ٹو بزنس تعاون اور نئے مواقع کے دروازے کھولے گا، جو پاکستان کی معاشی ترقی میں معاون ثابت ہوگا۔
