ٹوکیو، 20 اگست (اے پی پی): وزیراعلیٰ پنجاب مریم نواز شریف نے جاپان کے بین الاقوامی امور کے سینئر نائب وزیر ماٹسویوٹاکی ہیکو سے اہم ملاقات کی۔ ملاقات میں ٹرانسپورٹ، زراعت، صنعت، ماحولیات، صحت عامہ اور آئی ٹی کے شعبوں میں جاپانی ٹیکنالوجی پنجاب لانے پر تفصیلی تبادلہ خیال ہوا۔
وزیراعلیٰ مریم نواز نے جاپان کو پنجاب میں ہائیڈروجن اور ہائبرڈ کاروں کی تیاری اور اسمبلنگ کی دعوت دیتے ہوئے کہا کہ جاپانی ساختہ ٹریکٹرز، سوپرسیڈرز، تھریشرز اور جدید زرعی مشینری پنجاب کے کسانوں کے لئے نہایت مفید ثابت ہوں گی۔ انہوں نے جاپانی کمپنیوں کو پنجاب کے خصوصی اقتصادی زونز میں مینوفیکچرنگ اور سپلائی چین میں شمولیت کی پیشکش بھی کی۔ مریم نواز نے بتایا کہ پنجاب میں سرمایہ کاروں کے لئے سہولت ڈیسک قائم کیا گیا ہے اور سرمایہ کاری کے راستے میں حائل تمام رکاوٹیں دور کر دی گئیں ہیں۔ انہوں نے کہا کہ پنجاب سرمایہ کاری بورڈ اور وفاقی سطح پر ایس آئی ایف سی غیر ملکی سرمایہ کاروں کے لئے مکمل سہولت کی ضمانت ہیں۔ وزیراعلیٰ نے جاپانی کمپنیوں کو نواز شریف آئی ٹی سٹی میں مصنوعی ذہانت، روبوٹکس اور گیمنگ کے منصوبے شروع کرنے کے ساتھ ساتھ نواز شریف میڈیکل ڈسٹرکٹ میں جدید طبی سہولیات میں سرمایہ کاری کی دعوت بھی دی۔ انہوں نے کہا کہ پنجاب کو آئیڈیل بزنس لوکیشن اور سازگار سرمایہ کاری کا ایکو سسٹم بنایا جا رہا ہے جبکہ گرین انڈسٹریل زون اور سمال انڈسٹریل زونز کو فروغ دیا جا رہا ہے۔ سینئر نائب وزیر ماٹسویوٹاکی ہیکو نے وزیراعلیٰ اور ان کے وفد کا خیر مقدم کرتے ہوئے پنجاب حکومت کے کاروبار دوست اقدامات اور جاپان سے تعاون بڑھانے کے جذبے کو سراہا۔
