اسلام آباد، 30 اگست ( اے پی پی): وزیرِ تجارت جام کمال خان سے راولپنڈی چیمبر آف کامرس اینڈ انڈسٹری (آر سی سی آئی) کے صدر عثمان شوکت کی سربراہی میں وفد نے ملاقات کی، جس میں پاکستان کی برآمدات میں اضافے اور عالمی تجارت میں صنعت کے کردار کو مضبوط بنانے پر تبادلہ خیال کیا گیا۔دوران ِ گفتگو وفاقی وزیر نے حکومت کی جانب سے بزنس کمیونٹی کو ہر ممکن سہولت فراہم کرنے کے عزم کو دہرایا اور کہا کہ برآمدکنندگان کے لیے سازگار ماحول پیدا کرنا وقت کی ضرورت ہے۔ انہوں نے زور دیا کہ پاکستان کی معاشی ترقی اس بات سے مشروط ہے کہ غیر ضروری رکاوٹیں ختم کی جائیں، صنعتوں کے اخراجات کم کیے جائیں اور بین الاقوامی منڈیوں تک آسان رسائی فراہم کی جائے۔
جام کمال خان نے کہا کہ عالمی تجارتی رجحانات تیزی سے بدل رہے ہیں اور بزنس کمیونٹی کو نئے مواقع کی نشاندہی کے لیے فعال کردار ادا کرنا ہوگا۔ ان کا کہنا تھا کہ پاکستان کی صنعتی و تجارتی صلاحیت اس وقت ہی اجاگر ہوگی جب ہماری صنعتیں عالمی سطح پر مقابلہ کرنے کے قابل ہوں۔
انہوں نے واضح کیا کہ ہمیں رکاوٹیں کھڑی کرنے کے بجائے اپنی صنعتوں کو سہولت فراہم کرنی چاہیے، یہی راستہ ہے جس سے پاکستان نئی منڈیوں تک رسائی حاصل کر کے قومی آمدنی میں اضافہ کر سکتا ہے۔
آر سی سی آئی کے وفد نے حکومت کی تجارتی و صنعتی پالیسیوں میں مکمل تعاون کی یقین دہانی کرائی اور عالمی منڈیوں میں پاکستان کے کردار کو مزید مؤثر بنانے کے لیے تجاویز پیش کیں۔
