اسلام آباد۔22اگست (اے پی پی):وزیر اعظم محمد شہباز شریف کی زیر صدارت وفاقی کابینہ نے زرعی پیداواری لاگت کم کرنے کیلئےکمیٹی قائم جبکہ خصوصی اقتصادی زونز قانون 2012 میں ترمیم کی اصولی منظوری دے دی۔ وزیراعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف کی زیر صدارت وفاقی کابینہ کا اجلاس جمعہ کو یہاں منعقد ہوا۔ اجلاس کے دوران وزیر اعظم و وفاقی کابینہ نے ملک بھر میں بارشوں اور سیلاب میں جاں بحق ہونے والوں کیلئے خصوصی دعا کی۔ وزیر اعظم نے سیلاب سے متاثرہ علاقوں کا دورہ کرنے اور ریسکیو و ریلیف اقدامات کی نگرانی کرنے والے کابینہ ارکان کا خصوصی شکریہ ادا کیا۔ وفاقی کابینہ کے اجلاس میں وزرات قومی غذائی تحفظ و تحقیق کی سفارش پر یوریا کی قیمتوں میں توازن کے حوالے سے سفارشات پیش کی گئیں۔ وزیراعظم نے کہا کہ کسانوں کی پیداوار میں اضافے کیلئے ان کی پیداواری لاگت کو کم کرنا ہوگا۔ وزیر اعظم نے اس حوالے سے وزیر ماحولیاتی تبدیلی ڈاکٹر مصدق ملک، وزیر پٹرولیم علی پرویز ملک، وزیر قومی غذائی تحفظ رانا تنویر حسین، مشیر وزیر اعظم محمد علی اور معاون خصوصی صنعت ہارون اختر پر مشتمل کمیٹی تشکیل دے دی۔ وفاقی کابینہ کو وزرات صنعت و پیداوار کی جانب سے یوٹیلٹی سٹورز کارپوریشن کی تحلیل کی سمری منظوری کیلئے پیش کی گئی جس کی کابینہ نے متفقہ طور پر منظوری دے دی۔ بیان کے مطابق 31 جولائی سے ملک بھر میں یوٹیلٹی سٹورز کا آپریشن ختم کر دیا گیا ہے، تحلیل کے دوران وزیر اعظم کی ہدایت پر ملازمین کے حقوق کا مکمل خیال رکھا جائے گا۔ وزیر اعظم نے اس عمل کو شفاف طریقے سے حتمی شکل دینے اور ملازمین کے حقوق کے حوالے سے تمام تر قانونی و دیگر ضابطوں کو مدنظر رکھنے کی ہدایت کی۔ وفاقی کابینہ نے ملکی صنعتی ترقی اور نئی صنعتوں کے قیام کی حوصلہ افزائی کیلئے خصوصی اقتصادی زونز قانون 2012 میں ترمیم کی اصولی منظوری دے دی، نئی ترامیم کے تحت خصوصی اقتصادی زونز کو مزید کاروبار و سرمایہ کار دوست ماحول فراہم کیا جائے گا جس سے صنعتوں کی تعمیر کی رفتار میں اضافہ ہوگا۔ وزیراعظم نے کہا کہ ملکی صنعتی ترقی کیلئے کاروبار و سرمایہ کار دوست ماحول فراہم کرنا انتہائی ضروری ہے۔ انہوں نے کہا کہ اللہ کے فضل و کرم سے ملکی معیشت مستحکم اور ترقی کی راہ پر گامزن ہے، صنعتوں کی تعمیر سے ملکی برآمدات اور روزگار میں اضافہ ہوگا۔ وفاقی کابینہ نے کابینہ ڈویژن کی سفارش پر قومی اقتصادی کونسل کی مالی سال 2023-24 کی سالانہ رپورٹ کو پارلیمنٹ کے سامنے پیش کرنے کی بھی منظوری دی۔ اس کے علاوہ وفاقی کابینہ نے اقتصادی رابطہ کمیٹی (ای سی سی) کے 19 اگست 2025ء کو منعقدہ اجلاس اور کابینہ کمیٹی برائے قانون سازی کیسز (سی سی ایل سی) کے 18 اگست 2025ء کو منعقدہ اجلاس میں کئے گئے فیصلوں کی بھی توثیق کی۔
