بیجنگ، 05 اگست (اے پی پی): وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے بیجنگ میں عالمی شہرت یافتہ ٹیکنالوجی کمپنی ZTE کے ہیڈکوارٹر اور نمائشی ہال کا دورہ کیا، جہاں انہوں نے کمپنی کی جدید مصنوعات اور ڈیجیٹل حل کا مشاہدہ کیا۔ اس موقع پر انہوں نے ZTE کی 40ویں سالگرہ کا کیک بھی کاٹا۔
احسن اقبال نے بتایا کہ چین کے اس سرکاری دورے کے دوران ZTE کے ساتھ ایک تاریخی شراکت داری قائم کی گئی ہے، جس کا باضابطہ آغاز وزیراعظم شہباز شریف کے آئندہ ماہ دورۂ چین کے دوران کیا جائے گا۔
وفاقی وزیر نے اعلان کیا کہ ZTE پاکستان میں نوجوانوں کے لیے ایک جامع اور ملک گیر تربیتی پروگرام کا آغاز کرے گی، جس کا مقصد نوجوانوں کو مستقبل کے تقاضوں سے ہم آہنگ اور مارکیٹ کی ضروریات کے مطابق ڈیجیٹل مہارتوں سے آراستہ کرنا ہے۔
پروفیسر احسن اقبال نے مزید کہا کہ ZTE پاکستان میں اپنا آٹھواں عالمی ٹریننگ سینٹر بھی قائم کرے گی،جو جدید ٹیکنالوجی کی عملی تعلیم فراہم کرتے ہوئے پاکستانی نوجوان ٹیلنٹ کو عالمی سطح پر مقابلے کے لیے تیار کرے گا۔
انہوں نے کہا کہ سی پیک فیز II کا بنیادی نکتہ ٹیکنالوجی کا تبادلہ، نوجوانوں کو بااختیار بنانا اور پائیدار ترقی کو فروغ دینا ہے۔
اس موقع پر وفاقی وزیر نے ZTE کو پاکستان میں آئی ٹی کے شعبے میں نوجوانوں کے ٹیلنٹ سے فائدہ اٹھانے کی دعوت دی اور کمپنی کو پاکستان میں ایک ریسرچ اینڈ ڈویلپمنٹ سنٹر قائم کرنے کی تجویز بھی پیش کی۔
