اسلام آباد،20 اگست( اے پی پی): وفاقی وزیر پیٹرولیم علی پرویز ملک سے امریکی ناظم الامور نیٹلی اے بیکر نے ملاقات کی۔ ملاقات کے دوران تیل، گیس اور معدنیات کے شعبوں میں پاکستان اور امریکہ کے درمیان دوطرفہ تعاون کو مضبوط بنانے پر تفصیلی تبادلہ خیال کیا گیا۔
امریکی ناظم الامور نیٹلی بیکرنے کہا کہ صدر ٹرمپ کے وژن کے مطابق پاکستان کے تیل، گیس اور معدنیات کے شعبے میں امریکی کمپنیاں گہری دلچسپی لے رہی ہیں ۔امریکی سفارتخانہ ایکسپلوریشن اینڈ پروڈکشن سیکٹر میں امریکی اور پاکستانی کمپنیوں کے درمیان براہ راست روابط کی سہولت کاری کرے گا۔
وفاقی وزیرعلی پرویز ملک نے کہا کہ امریکی سرمایہ کاروں کی پاکستانی توانائی سیکٹر میں گہری دلچسپی کا خیرمقدم کرتے ہیں، حکومت پاکستان آنشور اور آفشور میں تیل وگیس کے ایکسپلوریشن بلاکس کی بڈنگ راؤنڈ کر رہی ہے،یہ بڈنگ راؤنڈ بین الاقوامی شراکت داروں کے لیے سرمایہ کاری کا زبردست موقع ہے ۔ امریکی کمپنیوں کے ساتھ معلومات کا تبادلہ کر رہے ہیں ۔ انہوں نے کہا کہ پاکستان میں شیل آئل اور گیس سمیت وسیع مقامی وسائل موجود ہیں ، ان وسائل کو ٹھوس ذخائر میں تبدیل کرنا ہماری حکومت کا ہدف ہے۔
امریکی ناظم الامورنیٹلی بیکرنے کہا کہ گزشتہ دنوں پاک امریکہ کاؤنٹر ٹیررازم ڈائیلاگ ہوا،ہم اس شراکت کو معاشی میدان میں بھی آگے بڑھانا چاہتے ہیں۔
