اسلام آباد ،5 اگست ( اے پی پی): وفاقی وزیر برائے انسانی حقوق سینیٹر اعظم نذیر تارڑ نے یومِ استحصال کشمیر پر کشمیری عوام سے اظہارِ یکجہتی کرتے ہوئے کہا کہ بھارتی اقدام اقوام متحدہ کی قراردادوں اور بین الاقوامی قوانین کی کھلی خلاف ورزی قرار دیا ہے۔
یوم استحصال کشمیر پر انہوں نےاپنے پیغام میں کہا کہ 5 اگست 2019، بھارتی آئین کے آرٹیکل 370 اور 35A کے خاتمے کا سیاہ دن ہے، کشمیر اب بھی بدترین محاصرے، بلیک آؤٹ، اور انسانی حقوق کی سنگین خلاف ورزیوں کا شکار ہے۔عالمی برادری ظلم پر خاموشی اختیار نہ کرے، یہ دراصل حمایت کے مترادف ہے۔
سینیٹر اعظم نذیر تارڑ نے کہا کہ پاکستان کشمیریوں کے حق خود ارادیت کی بھرپور حمایت جاری رکھے گا، عالمی فورمز پر بھارت کے غیر قانونی اقدامات کو بے نقاب کرتے رہیں گے۔ کشمیر کی آزادی، امن اور انصاف کی جدوجہد میں پاکستان کشمیری عوام کے ساتھ کھڑا ہے۔
