اسلام آباد،02 اگست(اے پی پی):وفاقی وزیر تجارت جام کمال خان اور پاکستان میں رومانیہ کے سفیر ڈین اسٹونیسکو کے درمیان ہفتہ کو یہاں ملاقات ہوئی جس میں تجارت، لاجسٹکس، دفاع، توانائی اور ثقافت کے شعبوں میں تعاون کو فروغ دینے پر تبادلہ خیال کیا گیا۔
رومانیہ کے سفیر نے پاکستانی برآمدات کے لیے بلیک سی اور ڈینیوب دریا کے ذریعے یورپ تک براہ راست رسائی کے لیے رومانیہ کی کنسٹانزا بندرگاہ کو استعمال کرنے کی تجویز دی۔ وفاقی وزیر نے اس تجویز کا خیرمقدم کرتے ہوئے اسے پاکستان کی برآمدی لاجسٹکس کو متنوع بنانے کے لیے ایک قابل عمل قدم قرار دیا۔
ملاقات میں زرعی اجناس، گوشت کی برآمدات، دواسازی، سرجیکل آلات، پنکھوں اور گرین انرجی کے شعبوں میں تعاون بڑھانے پر بھی گفتگو ہوئی۔ توانائی کے شعبے میں رومانیہ نے پاکستان کو شمسی اور ہوا سے بجلی پیدا کرنے کی جدید ٹیکنالوجی فراہم کرنے کی پیشکش کی تاکہ ملک کی گرین انرجی کی جانب منتقلی میں مدد دی جا سکے۔ رومانیہ نے پاکستان کی صنعتی صلاحیتوں کا اعتراف کرتے ہوئے صنعتی شراکت داری میں دلچسپی ظاہر کی۔
وفاقی وزیر تجارت نے آگاہ کیا کہ حکومت پاکستان مرحلہ وار ٹیرف اور نان ٹیرف رکاوٹوں کو کم کر رہی ہے، جس سے رومانیہ کی کمپنیوں کو جوائنٹ وینچرز کے ذریعے پاکستان میں سرمایہ کاری کے لیے پرکشش مواقع میسر آئیں گے۔سفیر اسٹونیسکو نے پاکستان کی آئی ٹی انڈسٹری کی تیز رفتار ترقی کو سراہا اور پاکستانی آئی ٹی ماہرین کی صلاحیتوں کو قابل تعریف قرار دیا۔
انہوں نے کہا کہ رومانیہ میں پاکستانی ٹیکنالوجی ماہرین کے لیے بڑے مواقع موجود ہیں اور اس حوالے سے باہمی تبادلے کو فروغ دینے کے لیے رومانیہ تیار ہے۔وزیر تجارت نے حکومت کی آئی ٹی سیکٹر کے فروغ کے لیے پالیسی اقدامات پر روشنی ڈالتے ہوئے کہا کہ پاکستانی آئی ٹی پروفیشنلز علاقائی مسابقت میں کامیابی سے آگے بڑھ رہے ہیں اور عالمی سطح کے کلائنٹس کو معیاری خدمات فراہم کر رہے ہیں۔
دونوں فریقین نے ٹیکنالوجی کے شعبے میں تعاون کو مزید مضبوط بنانے پر اتفاق کیا۔ملاقات میں ثقافتی سفارت کاری اور کمیونٹی انضمام کے موضوعات بھی زیر بحث آئے، اور ویزہ سہولتوں اور روابط میں بہتری کی ضرورت پر زور دیا گیا۔
ملاقات میں دونوں ممالک نے تجارتی نمائشوں اور آئندہ ملاقاتوں کے ذریعے دوطرفہ تعلقات کو مزید مستحکم کرنے کے عزم کا اعادہ کیا۔
