لاہور، 10اگست (اے پی پی): پاکستان مسلم لیگ ن کے صدر محمد نواز شریف اور وزیراعلیٰ پنجاب مریم نواز شریف سے متحدہ عرب امارات کے پاکستان میں سفیر حماد عبید ابراہیم سالم الزعابی نے لاہور میں ملاقات کی۔ اس موقع پر محمد نواز شریف اور مریم نواز شریف نے یو اے ای کے سفیر کا پرتپاک اور پرخلوص استقبال کیا۔ ملاقات میں پاکستان اور یو اے ای کے درمیان برادرانہ تعلقات،اقتصادی شراکت داری،تعلیم، سائنس، اور پائیدار ترقی کے شعبوں میں تعاون کو مزید وسعت دینے پر تفصیلی تبادلہ خیال کیا گیا۔ فریقین نے دوطرفہ تعاون کو نئی بلندیوں تک لے جانے کے عزم کا اظہار کیا۔ محمد نواز شریف اور مریم نواز شریف نے صدر یو اے ای شیخ محمد بن زاید النہیان کی قیادت کو خراج تحسین پیش کیا اور کہا کہ یو اے ای کی سائنسی ترقی، ماحول دوست پالیسیاں اور جدید وژن قابلِ تقلید ہیں۔ محمد نواز شریف نے کہا کہ “پاکستان اور یو اے ای کا رشتہ محض سفارتی نہیں بلکہ دلوں کا بندھن ہے،جو ہرآزمائش میں سرخرو رہا ہے۔” وزیراعلیٰ مریم نواز شریف نے کہا کہ پاکستان یو اے ای کے ساتھ تعلیم، تحقیق، اور ماحولیات جیسے اہم شعبوں میں اشتراک عمل کو مزید وسعت دینے کی خواہاں ہے۔ انہوں نے سرکاری اور سفارتی پاسپورٹ ہولڈرز کے لیے ویزا فری انٹری کی سہولت کو سراہتے ہوئے اسے دونوں ممالک کے اعتماد اور دوستی کا مظہر قرار دیا۔ مریم نواز نے پاک یو اے ای تجارتی حجم میں اضافے کو خوش آئند قرار دیا اور کہا کہ پنجاب میں تعلیم، صحت، انفراسٹرکچر اور قابلِ تجدید توانائی کے شعبوں میں جدید خطوط پر ترقی ہو رہی ہے۔ انہوں نے یو اے ای کے سرمایہ کاروں، اداروں اور کاروباری برادری کو پنجاب میں سرمایہ کاری کی دعوت دیتے ہوئے کہا کہ “پنجاب بزنس فرینڈلی انوائرنمنٹ کے ساتھ سرمایہ کاری کے لیے بہترین انتخاب بن چکا ہے۔” ملاقات دوستانہ ماحول میں ہوئی جس میں دونوں برادر ممالک کے درمیان دیرینہ تعلقات کو مزید مستحکم بنانے کے عزم کا اعادہ کیا گیا۔
