اسلام آباد، 5 اگست (اے پی پی): وفاقی وزیر برائے ہاؤسنگ اینڈ ورکس میاں ریاض حسین پیرزادہ نے یومِ استحصال کے موقع پر اپنے پیغام میں کہا ہے کہ 1947 سے ہمارے کشمیری بھائی اپنی آزادی اور خودمختاری کے لیے جدوجہد کر رہے ہیں۔
انہوں نے کہا کہ 5 اگست 2019 کو بھارت نے آرٹیکل 370 اور 35 اے کو یکطرفہ منسوخ کر کے کشمیر کی خصوصی حیثیت کو ختم کرنے کا غیر قانونی اور قابل مذمت اقدام اٹھایا۔ اس اقدام کے بعد مقبوضہ کشمیر میں بے تحاشا ظلم ڈھائے گئے اور کشمیری قیادت کو جیلوں میں بند کیا گیا۔
وفاقی وزیر نے زور دیا کہ کشمیریوں کی آزادی اور حقِ خودارادیت کی کوششوں کو کسی بھی طرح سے دبایا نہیں جا سکتا۔ پاکستان نے ہمیشہ اپنے کشمیری بھائیوں کی اس جدوجہد میں ان کا ساتھ دیا ہے اور آئندہ بھی دیتا رہے گا۔
انہوں نے کہا کہ پوری دنیا میں اس ظلم کے خلاف آواز اٹھائی جاتی ہے لیکن بھارت اپنے ظلم سے باز نہیں آتا۔
ریاض حسین پیرزادہ نے کہا کہ کشمیر ہماری شہ رگ ہے اور کشمیریوں سے ہمارا مذہبی، اخلاقی اور خونی رشتہ ہے۔ حکومت پاکستان، افواج پاکستان اور عوام ہمیشہ کشمیریوں کے ساتھ کھڑے ہیں۔
آخر میں انہوں نے دعا کی کہ جلد کشمیری عوام کو ان کے جائز حقوق میسر آئیں اور کشمیر کا مسئلہ کشمیریوں کی امنگوں کے مطابق حل ہو۔
