اسلام آباد، 05 اگست (اے پی پی): وفاقی وزیر برائے قومی غذائی تحفظ و تحقیق رانا تنویر حسین نے یومِ استحصال کے موقع پر اپنے پیغام میں کہا ہے کہ بھارت کا 5 اگست 2019 کا اقدام عالمی قوانین اور اقوامِ متحدہ کی قراردادوں کی کھلی خلاف ورزی ہے۔ انہوں نے کہا کہ کشمیر میں انسانی حقوق کی سنگین پامالیاں دنیا کی آنکھوں کے سامنے ہو رہی ہیں اور بھارت نے کشمیریوں کی شناخت، زمین اور آزادی پر حملہ کیا ہے۔
رانا تنویر حسین نے کہا کہ مقبوضہ کشمیر ایک کھلی جیل میں تبدیل ہو چکا ہے اور بھارت کشمیریوں کی اکثریت کو اقلیت میں بدلنے کی سازش کر رہا ہے۔ انہوں نے کشمیری نوجوانوں کی گرفتاریوں اور میڈیا پر عائد پابندیوں کو قابلِ مذمت قرار دیا۔
وفاقی وزیر نے عالمی برادری سے مطالبہ کیا کہ وہ ظلم کے اس سیاہ باب پر خاموش تماشائی نہ بنے۔ ان کا کہنا تھا کہ آزادی کی تڑپ ظلم کی زنجیروں سے نہیں دبائی جا سکتی اور پاکستان ہر فورم پر کشمیریوں کا مقدمہ لڑتا رہے گا۔
انہوں نے زور دیا کہ کشمیریوں کو حقِ خودارادیت دیا جانا اقوامِ متحدہ کی قراردادوں کا تقاضا ہے اور پاکستان ہر لمحے کشمیریوں کے ساتھ کھڑا ہے۔
