اسلام آباد: 5 اگست (اے پی پی ): یومِ استحصال کشمیر کے موقع پر وفاقی وزیر برائے تخفیف غربت و سماجی تحفظ سید عمران احمد شاہ نے اپنے پیغام میں کہا ہے کہ وزیراعظم شہباز شریف کے وژن کے مطابق پاکستان کشمیری عوام کے ساتھ مکمل یکجہتی کا اظہار کرتے ہیں۔
انہوں نے کہا کہ 5 اگست 2019 کے بھارتی اقدامات غیرقانونی ہیں اور یہ اقوامِ متحدہ کی قراردادوں کی صریح خلاف ورزی ہے۔ بھارت نے جموں و کشمیر کی خصوصی آئینی حیثیت ختم کر کے نہ صرف انسانی حقوق پامال کیے بلکہ کشمیریوں کو ان کے بنیادی حقِ خودارادیت سے بھی محروم کیا۔
وفاقی وزیر نے عالمی برادری پر زور دیا کہ اقوامِ متحدہ اور دیگر عالمی ادارے کشمیریوں کے حقِ خودارادیت کے لیے مؤثر آواز بلند کریں۔ انہوں نے کہا کہ کشمیری عوام کی پرامن جدوجہد کو طاقت کے زور پر دبانے کی کوششیں ناکام ہوں گی اور وہ اپنے انسانی، سیاسی اور جمہوری حق کے حصول کی جدوجہد سے پیچھے نہیں ہٹیں گے۔
سید عمران احمد شاہ نے مطالبہ کیا کہ اقوامِ متحدہ کے اداروں اور آزاد میڈیا کو مقبوضہ کشمیر میں رسائی دی جائے تاکہ وہاں کی اصل صورتحال دنیا کے سامنے آسکے۔ انہوں نے واضح کیا کہ پاکستان کشمیری عوام کے حقِ خودارادیت کی مسلسل حمایت کرتا رہے گا۔
وفاقی وزیر نے کہا کہ بھارت جب تک 5 اگست 2019 کے اقدامات واپس نہیں لیتا، جنوبی ایشیا میں پائیدار امن ممکن نہیں۔ ان کا کہنا تھا کہ یومِ استحصال خاموشی کا نہیں بلکہ حق اور انصاف کے لیے آواز بلند کرنے کا دن ہے۔
انہوں نے عزم ظاہر کیا کہ کشمیریوں کو ان کا جائز حقِ خودارادیت دلوانے تک پاکستان کی جدوجہد جاری رہے گی۔
