اسلام آباد، 05 اگست ( اے پی پی): وفاقی وزیر برائے امورِ کشمیر، گلگت بلتستان اور سیفران، انجینئر امیر مقام نے کہا ہے کہ 5 اگست 2019 بھارت کے زیر قبضہ غیر قانونی جموں و کشمیر (IIOJK) کی تاریخ کا سیاہ ترین دن ہے، جب بھارت نے کشمیری عوام کی مرضی کے خلاف اس کی خصوصی حیثیت ختم کر کے اسے دو نام نہاد یونین ٹیریٹریز میں تقسیم کر دیا۔
انہوں نے کہا کہ بھارت کے غیر قانونی اقدامات کا مقصد کشمیری مسلمانوں کو ان کی اپنی سرزمین میں اقلیت میں بدلنا اور ان کی سیاسی، ثقافتی اور آئینی شناخت کو مٹانا ہے۔ انتخابی حلقہ بندیوں کی تبدیلی، غیر کشمیریوں کو ڈومیسائل اور زمین کی ملکیت کی اجازت دینا اسی پالیسی کا حصہ ہے۔
وفاقی وزیر نے کہا کہ بھارتی فورسز کو انسانی حقوق کی سنگین خلاف ورزیوں اور املاک کے مسمار کرنے کی کھلی چھوٹ ہے، جبکہ ہزاروں کشمیری رہنما اور کارکن کئی برسوں سے جیلوں میں قید ہیں۔
انہوں نے عالمی برادری، اقوام متحدہ اور انسانی حقوق کی تنظیموں سے مطالبہ کیا کہ وہ IIOJK میں انسانی حقوق کی سنگین خلاف ورزیوں کا نوٹس لیں، سیاسی قیدیوں کی رہائی کو یقینی بنائیں اور سلامتی کونسل کی قراردادوں پر عمل درآمد کرائیں۔
انجینئر امیر مقام نے کشمیری عوام کی جدوجہد کو سلام پیش کرتے ہوئے کہا کہ پاکستان ان کے حقِ خودارادیت کے لیے سفارتی، سیاسی اور اخلاقی حمایت جاری رکھے گا۔
