لاہور،6دسمبر (اے پی پی): گوجرانوالہ میں ماس ٹرانزٹ بس منصوبے کی سنگِ بنیاد تقریب سے خطاب کرتے ہوئے وزیراعظم شہباز شریف نے کہا کہ ملک میں ترقی و خوشحالی کے نئے دور کا آغاز ہو چکا ہے اورعوامی خدمت کے وہ منصوبے دوبارہ شروع ہو رہے ہیں جن سے ملک میں خوشحالی آئے گی۔ ان کا کہنا تھا کہ حکومت اپنی کارکردگی کی بنیاد پر آئندہ انتخابات میں بھی سرخرو ہوگی۔
ان خیالات کا اظہار انہوں نے ہفتہ کے روز گوجرانوالہ میں ماس ٹرانزٹ بس سروس کے سنگ بنیاد کے موقع پرتقریب سے خطاب کرتے ہوئے کیا۔
وزیراعظم نے کہا کہ پنجاب میں ترقی کا جو سفر برسوں پہلے نواز شریف نے شروع کیا تھا، آج وہی وژن مریم نواز جدید انداز میں آگے بڑھا رہی ہیں۔ انہوں نے بتایا کہ سڑکوں کی تعمیر، اسپتالوں، تعلیمی اداروں اور دوسرے عوامی منصوبوں کی بنیاد اسی دور میں رکھی گئی، جبکہ اب مریم نواز ان منصوبوں کو مزید وسعت دینے میں مصروف ہیں۔
تقریب میں گفتگو کرتے ہوئے انہوں نے کہا کہ گوجرانوالہ میں ماس ٹرانزٹ سسٹم نہ صرف شہریوں کے سفر کو آسان بنائے گا بلکہ طلبہ، ملازمین اور مزدور طبقے کو بھی بہتر سفری سہولت فراہم کرے گا۔ وزیراعظم کے مطابق مریم نواز کی ٹیم نے صحت، ماحول، سیف سٹی، میٹرو منصوبوں، سستے گھروں اور دیگر شعبوں میں قابلِ قدر کام کیے ہیں۔
انہوں نے اس بات پر بھی زور دیا کہ پاکستان کی بڑی کامیابیاں—چاہے وہ ایٹمی پروگرام ہو، موٹروے ہو، توانائی منصوبے ہوں یا دہشت گردی کے خلاف کامیابیاں—ان میں نواز شریف اور مسلم لیگ (ن) کا نمایاں کردار رہا ہے۔ ان کے مطابق ملک آج معاشی استحکام، کم مہنگائی، امن و امان اور ترقی کی سمت گامزن ہے۔
وزیراعلیٰ پنجاب مریم نواز نے کہا کہ آنے والے دنوں میں صوبے بھر میں مزید بڑے منصوبے شروع کیے جائیں گے، جن سے شہریوں کو جدید سہولیات اور بہتر طرزِ زندگی ملے گا۔ تقریب کے اختتام پر وزیراعظم اور وزیراعلیٰ نے بس سروس منصوبے کی تختی کی نقاب کشائی کی۔
