اسلام آباد، 08 ستمبر(اے پی پی ): یونیسکو کے نمائندہ برائے پاکستان فواد پاشایف نے وفاقی وزیر برائے قومی ورثہ و ثقافت اورنگزیب خان کھچی کے ہمراہ منگل کے روز تاریخی پھروالا قلعہ، مائی قمرو مسجد اور مقبرہ سلطان مقرب خان کا دورہ کیا۔
سیکرٹری قومی ورثہ و ثقافت اسد رحمان گیلانی بھی یونیسکو کے وفد کے ہمراہ تھے۔
دورے کے دوران محکمہ آثارِ قدیمہ و عجائب گھر (ڈی او اے ایم) کے حکام نے یونیسکو کے نمائندہ کو ان تاریخی، آثارِ قدیمہ اور ثقافتی مقامات کی اہمیت اور محکمہ کی جانب سے ان کے تحفظ اور بحالی کے لیے کیے گئے اقدامات کے بارے میں بریفنگ دی۔
اس موقع پر فواد پاشایف نے مقام پر ایک پودا بھی لگایا، جو ماحولیات کے تحفظ اور ثقافتی ورثے کو آئندہ نسلوں کے لیے محفوظ رکھنے کے عزم کی علامت ہے۔
فواد پاشایف نے وفاقی وزیر اورنگزیب خان کھچی کی قیادت میں قومی ورثہ و ثقافت ڈویژن کی جانب سے پاکستان کے بھرپور ثقافتی ورثے اور گکھڑ قبیلے کی تاریخی میراث کے تحفظ اور فروغ کے لیے کی جانے والی کوششوں کو سراہا۔
انہیں بتایا گیا کہ پھروالا قلعہ، مائی قمرو مسجد اور مقبرہ سلطان مقرب خان سمیت یہ تاریخی مقامات پاکستان کی یونیسکو عالمی ورثہ کی عارضی فہرست (Tentative List) میں شامل ہیں۔ انہوں نے وفاقی دارالحکومت کی حدود میں واقع ان اہم تاریخی مقامات کے تحفظ اور بحالی کے لیے کیے گئے اقدامات پر اطمینان کا اظہار کیا۔
یونیسکو کے نمائندہ کو گکھڑ قبیلے کی تاریخ، خطے میں اس کے تاریخی کردار اور ان یادگاروں کی اہمیت کے بارے میں بھی آگاہ کیا گیا۔
وفاقی وزیر نے محکمہ آثارِ قدیمہ و عجائب گھر کی جانب سے جاری تحفظ و بحالی کے کام پر اطمینان کا اظہار کرتے ہوئے کہا کہ حکومت پاکستان قیمتی آثارِ قدیمہ اور ثقافتی ورثے کے تحفظ اور فروغ کے لیے پرعزم ہے تاکہ اسے آئندہ نسلوں تک منتقل کیا جا سکے۔
وفاقی وزیر نے کہا کہ شاہ اللہ دتہ غاروں کو خطے کی گندھارا تہذیب اور ثقافتی سیاحت کے فروغ کے لیے اکتوبر کے پہلے نصف میں افتتاح کے بعد سیاحوں کے لیے کھول دیا جائے گا۔ انہوں نے یونیسکو کے نمائندہ برائے پاکستان فواد پاشایف کو شاہ اللہ دتہ غاروں کی افتتاحی تقریب میں شرکت کی دعوت بھی دی۔
