اسلام آباد،13مارچ(اے پی پی ):وفاقی وزیر ریلوے شیخ رشید احمد نے کہا ہے کہ ای سی او تنظیم پاکستان،ترکی،ایران اورسینٹرل ایشیائی ممالک کے درمیان ریل نیٹ ورک بڑھانے پرتعاون کرے۔
وفاقی وزیر ریلوے شیخ رشید احمد سے ای سی او کے سیکرٹری جنرل ڈاکٹر ہادی سلمان پور نے ملاقات کی ، ملاقات میں اسلام آباد، تہران، استنبول (آئی ٹی آئی) کنٹیینر ٹرین کی بحالی پر بات چیت ہوئی جبکہ تینوں ممالک کے درمیان رابطے فعال کرنے پر اتفاق کیا گیا۔
ای سی او کے سیکرٹری جنرل ڈاکٹر ہادی سلمان پور نے پاکستان میں ریلوے نظام کی بہتری کی بھرپور تعاون کی یقین دہانی کرائی اور کہا کہ مالی شراکت داری کے لئے ای سی او ترقیاتی بنک سے استفادہ کیا جا سکتا ہے۔
سیکرٹری جنرل نے کہا کہ پاکستان ای سی او کا بنیادی ممبر ہےاور اہم ترین پارٹنر ہے۔ علاقائی ترقی میں ای سی او پاکستان کے کردار کو قدر کی نگاہ سے دیکھتی ہے۔
وزیر ریلوے شیخ رشید نے ای سی او سیکرٹری جنرل کو ایم ایل ٹو، تھری اور613 کلو میٹر لمبی کوئٹہ، تافتان (ایران) ریل لائن کی اپ گریڈیشن پر بریفنگ دی اور کہا کہ منصوبے کو جلد از جلد مکمل کرنے پر ای سی او تعاون کرے۔
شیخ رشید احمد نے کہا کہ بین الاقوامی شراکت داری سے پاکستان ریلوے آئندہ پانچ برس میں یکسر تبدیل ہو جائیگا جبکہ ریلوے کی موجودہ سپیڈ کو ڈبل کر دیا جائیگا۔
وی این ایس ، اسلام آباد
د
