اسلام آباد،13مارچ(اے پی پی ):وزیر اطلاعات چوہدری فواد حسین نے کہا ہے کہ عمران خان کے علاوہ آج تک کسی کو مافیا کیخلاف لڑنے کی جرات نہیں ہوئی عمران خان کی لڑائی شخصیات کیخلاف نہیں ملکی دولت لوٹنے والوں سے ہے، پاکستان ایک نئے دور میں داخل ہو رہا ہے۔
تحریک انصاف خیبرپختونخواہ یو تھ ونگ سے خطاب میں ان کا کہنا تھا کہ تحریک انصاف عوامی جماعت ہے ، جس نے تبدیلی کی بنیاد رکھی ہے۔ ان کا کہنا تھا کہ ملکی سیاسی جماعتیں عمران خان کے نام سے خوفزدہ ہیں۔عمران خان کی قیادت میں ہم نے فرسودہ نظام کو للکارا ہے۔تحریک انصاف نے ملک کی دو بڑی سیاسی جماعتوں کا گٹھ جوڑ ختم کیا ہے۔
وزیر اطلاعات کا کہنا تھا کہ پاکستان کامستقبل نوجوان نسل کیساتھ جڑا ہوا ہے۔ حالیہ کشیدہ صورتحال میں پورا پاکستان اپنی قیادت کیساتھ جڑا ہوا ہے۔ نوجوان نسل نے اپنے مستقبل کو سامنے رکھتے ہوئے ہمیں ووٹ دیا، تحریک انصاف نے علاقائی سیاست کے بجائے قومی سیاست کو فروغ دیا۔
انہوں نے کہا کہ گزشتہ حکومتوں کی غلط پالیسیوں سے ادارے تباہ ہوئے ،حکومت ایسا ماحول پیدا کریگی کہ ملازمتوں کے مواقع بڑھیں۔ عوام کیلئے ہاؤسنگ منصوبے بنائے جا رہے ہیں۔ تحریک انصاف کے کارکن ہمارے دست و بازو اور طاقت ہیں۔
وفاقی وزیر نے مزید کہا کہ خیبرپختونخوا کے نوجوان سیاسی وژن رکھتے ہیں اور خیبرپختونخوا کے نوجوانوں نے تحریک انصاف میں انقلاب کی بنیاد رکھی۔
وی این ایس، اسلام آباد
