اسلام آباد ، 27 مئی (اے پی پی): وزیر خارجہ شاہ محمود قریشی نے کہا ہے کہ ازبک نائب وزیراعظم کا دورہ پاکستان دونوں ممالک کے مابین معاشی شراکت داری اور خطہ میں روابط بڑھانے میں اہم کردار اداکرے گا، دونوں ممالک کے درمیان دوطرفہ تجارت کے حجم کو 300 ملین ڈالر تک لے جانے پر اتفاق کیا گیا۔ پیر کو وزارتِ خارجہ میں پاکستان اور ازبکستان کے مابین وفود کی سطح پر مذاکرات شروع ہوئے۔ ازبکستان کے وفد کی قیادت نائب وزیراعظم الیور وغنیوف جبکہ پاکستانی وفد کی قیادت وزیر خارجہ مخدوم شاہ محمود قریشی کر رہے ہیں۔ ازبکستان کے نائب وزیراعظم کے وفد میں سرمایہ کاری ، بیرون ملک تجارت اور ٹرانسپورٹ کے نائب وزراءشامل ہیں۔ مذاکرات میں دو طرفہ تعلقات، اقتصادی و تجارتی شعبہ جات میں دو طرفہ تعاون کے فروغ سمیت اہم علاقائی و عالمی امور پر تبادلہ خیال کیا گیا۔ اس موقع پر پاکستان اور ازبکستان کی قیادت کے مابین گزشتہ ملاقاتوں میں طے پانے والے فیصلوں پر عملدرآمد کا بھی جائزہ لیا گیا۔ فریقین نے پاکستان اور ازبکستان کے مابین دوطرفہ تجارت کے حجم کو 300میلین ڈالر تک لے جانے پر اتفاق کیا۔ اس موقع پر خطاب کرتے ہوئے مخدوم شاہ محمود قریشی نے کہا کہ ازبک نائب وزیراعظم کا دورہ پاکستان، دونوں ممالک کے مابین معاشی شراکت داری اور خطے کے روابط بڑھانے میں اہم کردار اداکرے گا۔ پاکستان ، وسط ایشیائی ممالک کے ساتھ روابط کو مزید فروغ دینا چاہتا ہے۔
ازبک نائب وزیراعظم نے پرتپاک خیر مقدم پر وزیر خارجہ مخدوم شاہ محمود قریشی کا خصوصی شکریہ ادا کیا۔ انہوں نے توقع ظاہر کی کہ اس دورے کے نتیجے میں ازبکستان کے ساتھ پاکستان کے دو طرفہ تعلقات مزید مستحکم ہوں گے اور دونوں ممالک کے درمیان گہری اقتصادی پارٹنر شپ کا راستہ ہموار ہوگا۔
وی این ایس، اسلام آباد
