اسلام آباد ، 10 جون (اے پی پی): وزیر اعظم عمران خان نے کہا ہے کہ جب تک ہم ٹیکس نہیں دینگے ہمارا ملک اوپر نہیں جا سکتا،عظیم قوم بننے کیلئے ہمیں اپنے آپ کو تبدیل کرنا ہوگا۔
پیر کو پاکستان ٹیلی ویژن اور ریڈیو پر قوم کے نام اہم پیغام میں وزیراعظم عمران خان نے کہا کہ پچھلے دس سال میں پاکستان کا قرضہ 6 ہزار ارب روپے سے بڑھ کر 30 ہزار ارب روپے تک پہنچ گیا ہے، اس کا عوام کو یہ نقصان ہوا ہے کہ ہم سالانہ چار ہزار ارب روپے جو ٹیکس جمع کرتے ہیں اس میں سے آدھا یعنی دو ہزار ارب روپے ان قرضوں کی اقساط ادا کرنے پر خرچ ہو جاتا ہے اور باقی بچ جانے والی رقم سے ملک کے خرچے پورے نہیں ہو سکتے۔ انہوں نے کہا کہ پاکستانی وہ قوم ہیں جو بد قسمتی سے سب سے کم ٹیکس دیتے ہیں لیکن سب سے زیادہ خیرات کرتے ہیں۔ انہوں نے کہا کہ ہمارے اندر جذبہ آگیا تو ہم سالانہ دس ہزار ارب روپے تک بھی ٹیکس جمع کر سکتے ہیں۔ بے نامی اثاثے ، بینک اکاﺅنٹس اور باہر پڑا پیسہ ظاہر کرنے کا 30جون تک وقت ہے، سب سے اپیل ہے کہ اثاثے ظاہر کرنے کی سکیم میں شرکت کریں۔انہوں نے بتایا کہ بے نامی اکاﺅنٹس، بے نامی اثاثوں اور بیرون ملک پاکستانیوں کی جائیدادوں کی معلومات آ رہی ہیں اور اس سلسلے میں معاہدے بھی ہوئے ہیں۔
وزیر اعظم نے کہا کہ جب تک کوئی قوم خود کوشش نہ کرے اللہ تعالیٰ اس کی حالت نہیں بدلتا ۔انہوں نے کہا ہے کہ اثاثے ظاہر کرنے کی سکیم سے فائدہ اٹھائیں اور ملک کو بھی فائدہ دیں ۔ انہوں نے ہدایت کی کہ اپنے بچوں کا مستقبل محفوط بنائیں اور موقع دیں کے ہم ملک کو پاﺅں پر کھڑا کریں اور لوگوں کو غربت سے نکالیں۔
وی این ایس ، اسلام آباد
