اسلام آباد ، 01 اکتوبر ( اے پی پی ): وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیراعظم عمران خان کے مظفرآباد کے دورہ سے زلزلہ سے متاثرہ کشمیری عوام کو نیا حوصلہ ملا ہے۔ ان کی امداد اور بحالی تک تعاون کا سلسلہ بھرپور انداز سے جاری رہے گا۔
سماجی رابطے کی ویب سائٹ ٹویٹر پر معاون خصوصی نے کہا کہ زلزلے میں جا بحق افرادکےلواحقین کومالی امدادکی فراہمی سے زلزلہ متاثرین کی بحالی میں مدد ملےگی۔ وفاقی حکومت جاں بحق افراد کے لواحقین کو 5لاکھ روپے فی کس دے گی جبکہ متاثرہ علاقوں میں بچوں کی تعلیم کاسلسلہ جاری رکھنےکیلئےخصوصی اقدامات کیےجارہے ہیں۔
ڈاکٹر فردوس عاشق اعوان نے کہا کہ گھروں اور مال مویشیوں کیلئےزرتلافی سے متاثرین کے نقصانات کاازالہ ممکن ہوگا، مکمل تباہ ہونے والوں مکانوں کیلئے 2لاکھ جبکہ جزوی متاثرہ مکانات کا معاوضہ 1لاکھ روپے دیا جائے گا ۔ انہوں نے کہا کہ زلزلہ سے متاثر ہونے والی سڑکوں کی تعمیر پنجاب حکومت کی ذمہ داری ہو گی۔ زلزلہ سے متاثرہ علاقوں میں انفراسٹرکچر کی بحالی کا تخمینہ 1200ملین لگایا ہے ۔ زخمیوں کی مدد کیلئے پاکستان بیت المال بھی حصہ ڈالے گا ۔
معاون خصوصی نے کہا کہ 38سکولوں کیلئے بڑے ٹینٹ فراہم کیے جا رہے ہیں ۔ خواتین کی سہولیات کے بھی اقدامات کئےگئے ہیں۔ زلزلہ میں مکمل تباہ ہونے والے دکانوں کے لیے 50ہزار روپے فی دکان ، جزوی طور پر متاثر ہونے والی دکان کے مالک کو 25ہزار روپے دیے جائیں گے جبکہ حکومت 50ہزار روپے فی مویشی مدد فراہم کرے گی ۔
وی این ایس ، اسلام آباد
