آرمی چیف مدت ملازمت توسیع کیس میں نظر ثانی درخواست حکومت کی جانب سے سپریم کورٹ میں دائر کر دی گئی ہے؛ ڈاکٹر فردوس عاشق اعوان

اسلام آباد ، 26 دسمبر (اے پی پی ): وزیر  اعظم کی معاون خصوصی برائے اطلاعات و نشریات   ڈاکٹر  فردوس عاشق اعوان نے کہا ہے کہ آرمی چیف مدت ملازمت  توسیع کیس میں  نظر ثانی  درخواست حکومت کی جانب سے سپریم کورٹ میں دائر کی گئی ہے۔

اسلام آباد میں میڈیا  کے نمائندوں سے گفتگو کرتے ہوئے   معاون خصوصی کا کہنا تھا کہ آرمی چیف مدت ملازمت  توسیع کیس میں نظر ثانی اپیل میں فیصلے میں موجود قانونی نقائص کی نشاندہی کی گئی ہے،نظر ثانی کی درخواست عوامی مفاد کے تحت دائر کی گئی ہے۔

ڈاکٹر  فردوس عاشق اعوان  نے کہا  کہ رانا ثناء اللہ کیس کی ضمانت سے متعلق تفصیلی فیصلہ آگیا ہے،اے این ایف اس فیصلے کیخلاف سپریم کورٹ میں نظر ثانی اپیل دائر کریگا۔اے این ایف کو میڈیا میں مسلسل نشانہ بنایا جارہا ہے۔ایسا تاثر دیا گیا جیسے رانا ثناء اللہ سے اے این ایف کو ذاتی رنجش ہو،اے این ایف کو رانا ثناء اللہ سے کوئی ذاتی رنجش یا عناد نہیں ہے۔

انہوں  نے کہاکہ میڈیا میں کہا گیا کہ  رانا ثناء اللہ کا جسمانی ریمانڈ کیو ں نہیں لیا گیا جبکہ جس بندے سے موقع پر ہی برآمدگی ہوجائے اس کا جوڈیشل ریمانڈ ہوتا ہے۔انہوں نے میڈیا سے اپیل کی کہ اے این ایف جیسے قومی ادارے کو متنازعہ نہ بنایا جائے۔

ڈاکٹر  فردوس عاشق اعوان نے کہا کہ وزیراعظم آج  116کلو میٹر طویل جلالپور نہر کا افتتاح کرینگے،جلالپور کینال کی تکمیل سے علاقے میں خوشحالی کی نئی لہر آئیگی اور  نہری نظام بہتر ہو گا،کسان اور زراعت کاشعبہ  بھی ترقی کرے گا۔

سورس : وی این ایس ، اسلام آباد