پشاور، 21مارچ(اے پی پی): پاک آرمی 73 بریگیڈ کے کمانڈربریگیڈیئر نجف عباس نےڈسٹرکٹ ہیڈ کوارٹر ہسپتال پاراچنار میں ٹراما سنٹرسمیت آئسولیشن وارڈ کا دورہ کیا اور کرونا کے حوالے سے کئے گئے انتظامات کا جائزہ لیا۔
اس موقع پر میڈیا اور ہسپتال کے عملے سے گفتگو کرتے ہوئے بریگیڈیئر نجف عباس کا کہنا تھا کہ عوام کو کرونا وائرس سے بچانے کے لئے کسی قسم کی غفلت اور لاپرواہی برداشت نہیں کی جائیگی۔ انہوں نے کہا کہ پاراچنار ہسپتال سمیت ضلع بھر میں کئے گئے انتظامات تسلی بخش ہیں اور اس سلسلے میں آئسولیشن وارڈ کے قیام کے ساتھ ساتھ قرنطینہ سنٹر بھی قائم کیا گیا ہے جہاں بیرونی ممالک سے آنے والوں کو احتیاط کے طور پر رکھا جائے گا تاکہ ان کے خاندان اور معاشرے کے دیگر افراد کو وائرس سے محفوظ رکھا جا سکے۔
آئسولیشن اور قرنطینہ وارڈز میں تمام تر مطلوبہ سہولیات میسر کر دی گئی ہیں جن کی لوگوں کو ضرورت ہوتی ہے۔ انہوں نے عوام سے اپیل کی کہ وہ کرونا وائرس سے بچنے کیلئے احتیاطی تدابیر پر عمل کریں اور حکومت کی جانب سے اٹھائے گئے اقدامات میں بھر پور تعاون کریں۔
اس دوران ڈسٹرکٹ ہیڈ کوارٹر ہسپتال پاراچنار کے ایم ایس ڈاکٹر ناصر علی اور ڈی ایم ایس ڈاکٹر ممتاز حسین نے بریگیڈیئر نجف عباس کو بریفنگ دی اور ہسپتال میں سہولیات کی کمی اور دیگر مسائل سے بھی آگاہ کیا ۔
اس موقع پر کمانڈنگ افیسر کرنل جاوید الیاس، اسسٹنٹ کمشنر عمر احمد خان اور ڈسٹرکٹ ہیلتھ آفیسر ڈاکٹر عطاء اللہ بھی موجود تھے
۔
