کوئٹہ، یکم اپریل (اے پی پی ): وزیراعلیٰ بلوچستان جام کمال خان نے کہا ہے کہ موجودہ صورتحال کے پیش نظر صوبے کے کسی بھی علاقے میں اشیاء خوردونوش کی قلت نہیں ہونے دی جاۓ گی ، تمام اضلاع کی انتظامیہ خوردنی اشیاء کی دستیابی اور قیمتوں میں استحکام کو یقینی بنایا جائے۔
بدھ کو یہاں منعقدہ اعلی سطحی اجلاس کی صدارت کرتے ہوئے انہوں نے فوڈسیکیورٹی کمیٹی کو روزانہ کی بنیاد پر ضلعوں میں خوردنی اشیاءکی دستیابی کا ڈیٹا حاصل کرنے اور صورتحال کی نگرانی کرتے ہوۓ رپورٹ وزیراعلیٰ سیکریٹیریٹ ارسال کرنے کی ہدایت کی ۔
اجلاس میں فوڈ سیکیورٹی اور ڈیلی ویجرز و مستحق افراد کو راشن اورمعاونتی پیکیج کی فراہمی سے متعلق امور کا جائزہ لیا گیا ، فوڈسیکیورٹی کمیٹی اور معاونتی پیکج کمیٹی کی جانب سے اجلاس کو متعلقہ امور پر بریفنگ دی گئی۔اجلاس میں فیصلہ کیا گیا کہ پہلے مرحلے میں کوئٹہ میں رضا کار تنظیموں کی معاونت سے مقرر کردہ مقامات پر مستحقین میں راشن کی تقسیم کا آغاز کیا جاۓ گا۔
اجلاس میں طے پایا کہ وفاقی حکومت سے صوبوں خاص طور پر بلوچستان کی جانب سے گندم خریدنے اور زخیرہ کرنے کے لیے رابطہ کیا جا ۓ گاجسے گندم کے سٹریٹیجک زخیرہ کے طور پر صورتحال خراب ہونے کی صورت میں استعمال کیا جاسکے۔ اجلاس میں فیصلہ کیا گیا کہ ضلعوں کی سطح پر مستحقین کی نشاندہی کا عمل مکمل کر کے ان میں نقد رقم یا راشن تقسیم کیا جاۓ گا ۔
اجلاس میں اضلاع کو معاونتی پیکیج کے لیے فوری طور پر فنڈز کے اجراء کا فیصلہ بھی کیا گیا۔
اجلاس میں صوبائی وزراء میر ظہور بلیدی میر ضیا ء لانگو اور سول و عسکری حکام نے شرکت کی۔
اے پی پی /کوئٹہ/حامد
