لاہور، 13 اکتوبر(اے پی پی): وزیر اعلیٰ پنجاب سردار عثمان بزدار نے کہا ہے کہ موجودہ حکومت پہلی کسان دوست حکومت ہے، کاشتکاروں کو جدید زراعت سے ہم آہنگ کرنے کے لئے زرعی مشینری کا استعمال ضروری ہے۔
یہ بات وزیر اعلیٰ پنجاب نے 90 شاہراہ قائد اعظم کا دورہ اور محکمہ زراعت کے زیر اہتمام جدید زرعی مشینری کی نمائش میں شرکت کے دوران خطاب کرتے ہوئے کہی۔اس موقع پر وزیر اعلیٰ پنجاب نے دھان کی فصل کاشت کرنے کے لئے مخصوص رائڈنگ رائس ٹرانسپلانٹر کا مشاہدہ سمیت دھان کی فصل کو زمین میں شامل کرنے والے رائس سٹرا شریڈر، ہیپی سیڈر،ڈرل اور ویٹ بیڈ پلانٹر شوگر کین پلانٹر کا معائنہ کیا۔اس کے علاوہ انہوں نے مزید آبپاشی کے جدید ترین سپرنکلر، رین گن سپرنکلر، ڈرپ سپر نکلر سولر سسٹم کا بھی مشاہدہ کیا۔
وزیر اعلیٰ پنجاب نے کاشتکاروں میں جدید زرعی مشینری و آلات کی فراہمی کے لئے الاٹمنٹ سرٹیفکیٹ تقسیم کیے اور کاشتکاروں کو ای کریڈٹ سکیم کے چیک بھی دیئے۔
سردار عثمان نے کہا کہ پنجاب کی تاریخ میں پہلی مرتبہ گنے کے کاشتکاروں کو ان کی محنت کا پورا معاوضہ دیا گیا، 2 سال میں شوگر ملوں سے کاشتکاروں کو 99 فیصد واجبات کی ادائیگی یقینی بنائی ہے۔کاشتکاروں کی خوشحالی اور زراعت کے فروغ کے لئے گندم اور گنے کے امدادی نرخوں میں خاطر خواہ اضافہ کیا جا رہا ہے جبکہ حکومت پنجاب نے کاشتکار بھائیوں کی سہولت کے لئے ای کریڈٹ سکیم کے قرضوں کی حد بڑھا دی ہے۔ کاشتکار کو اب بیج، کھاد اور دیگر زرعی مداخل کے حصول میں دشواری کا سامنا نہیں کرنا پڑے گا، ربیع کی فصل کے لئے ای کریڈٹ سکیم کے قرضوں میں 5 ہزار اور خریف کے لئے 10 ہزار روپے اضافہ کیا گیا ہے۔ 2 سال میں کاشتکاروں کو 35 ارب روپے کے بلا سود قرضے فراہم کیے جا چکے ہیں، وزیر اعظم زرعی ایمرجنسی پروگرام کے تحت 300 ارب روپے کاشتکاروں کی خوشحالی اور زرعی ترقی پر صرف کیے جا رہے ہیں، فی ایکڑ پیداوار میں اضافے اور آبپاشی کی سہولتوں میں بہتری لائی جا رہی ہے۔کاشتکاروں کیلئے جدید طریقہ زراعت سے ہم آہنگ کرنے کے لئے زرعی مشینری کا استعمال بے حد ضروری ہے، حکومت پنجاب سبسڈی فراہم کر کے کاشتکاروں کو جدید مشینری خریدنے کی ترغیب دیتی ہے،پنجاب میں کاشتکاروں کو 46 کروڑ روپے کی مشینری امدادی نرخ پر فراہم کی جا چکی ہے، 2 سال میں 78 ہزار ایکڑ بنجر اراضی کو قابل استعمال بنانے سے کاشتکار کی آمدن میں اڑھائی ارب روپے کا اضافہ ہوا۔ انہوں نے مزید کہا پنجاب میں زرعی تحقیق کیلئے 6ارب روپے مختص کئے گئے ہیں، حکومت پنجاب کے کسان دوست اقدامات کی وجہ سے اس سال گندم، چنے اور کینولا وغیرہ کی اضافی پیداوار حاصل ہوئی،کاشتکار بھائیوں کے مسائل کے حل کے وعدوں کو ایفا کرنے کے لئے اسی جوش و جزبے کی ضرورت ہے، وزیر زراعت حسین جہانیاں گریزی اور ان کی ٹیم پنجاب کو غذائی خودکفالت کی راہ پر گامزن کرنے میں اپنا بھرپور کردار ادا کرے گی۔
اس موقع پر صوبائی وزیر زراعت نے کہا پنجاب میں زراعت کا فروغ ملک کی معاشی ترقی کا ضامن ہے، جدید زرعی مشینری کے استعمال سے فی من ایکڑ پیداوار بڑھے اور لاگت میں کمی آئے گی۔
