تیزی سے بدلتے  عالمی منظر نامے کےپیش نظر  ہمیں سفارت کاری کو  جدید تقاضوں سے ہم آہنگ بنانا ہو گا، شاہ محمود قریشی

اسلام آباد۔25دسمبر  (اے پی پی):وزیر خارجہ شاہ محمود قریشی نے کہا کہ ہمیں اپنی سفارت کاری کو تیزی سے بدلتے ہوئے عالمی منظر نامے کو پیش نظر رکھتے ہوئے جدید تقاضوں سے ہم آہنگ بنانا ہو گا، معاشی سفارت کاری ہماری سفارتی ترجیحات کا اہم حصہ ہے، معاشی سفارت کاری ڈویژن کا قیام جلد عمل میں لایا جائے گا۔ ان خیالات کا اظہار انہوں نے معاشی سفارت کاری کے حوالے سے اہم اجلاس کی صدارت کرتے ہوئے کیا، وزیر اعظم کے معاون خصوصی برائے قومی سلامتی معید یوسف بھی اجلاس میں شریک ہوئے۔ وزارتِ خارجہ میں منعقدہ اس اجلاس میں معاشی سفارت کاری کے فروغ کے مختلف پہلوئوں پر غورکیا گیا۔ وزارت خارجہ کے ایڈیشنل سیکرٹری برائے معاشی سفارت کاری نبیل منیر، ترجمان وزارت خارجہ زاہد حفیظ چوہدری اور وزارتِ خارجہ کے سینئر افسران نے اجلاس میں شرکت کی۔ وزیر خارجہ شاہ محمود قریشی نے کہا کہ ہمیں اپنی سفارت کاری کو تیزی سے بدلتے ہوئے عالمی منظر نامے کو پیش نظر رکھتے ہوئے جدید تقاضوں سے ہم آہنگ بنانا ہو گا۔ انہوں نے کہا کہ معاشی سفارت کاری ہماری سفارتی ترجیحات کا اہم حصہ ہے۔ وزیر خارجہ نے کہا کہ معاشی سفارت کاری ڈویژن کا قیام جلدعمل میں لایا جائے گا۔ مخدوم شاہ محمود قریشی نے کہا کہ وزارتِ خارجہ کا حصہ بننے والے نئے افسران کو معاشی سفارت کاری اور پبلک ڈپلومیسی کے حوالے سے خصوصی تربیت دی جائے گی۔ انہوں نے کہا کہ جدید ٹیکنالوجی کا استعمال وقت کی اہم ضرورت ہےلہذٰا وزارتِ خارجہ میں جدید ٹیکنالوجی کے استعمال کو یقینی بنایا جائے گا۔ اجلاس میں اسٹریٹیجک کمیونیکیشن ڈویژن کی کارکردگی کا بھی جائزہ لیا گیا۔ وزیر خارجہ نے اسٹریٹیجک کمیونیکیشن ڈویژن کو مزید فعال بنانے کیلئے تمام ممکنہ اقدامات اٹھانے کی بھی ہدایت کی۔