اسلام آباد، 31 دسمبر(اے پی پی ):وزیراعظم کے معاون خصوصی برائے اسٹیبلشمنٹ محمد شہزاد ارباب کی زیرِ صدارت وزیراعظم اور وزرا کے مابین ہونے والے کارکردگی کے حالیہ معاہدوں پر عملدرآمد سے متعلق جائزہ اجلاس ہوا۔ جائزہ اجلاس میں پلاننگ کمیشن کے ڈپٹی چیئرمین جہانزیب خان اور اسٹیبلشمنٹ ڈویژن کے سینئر افسران بھی موجود تھے۔
معاون خصوصی برائے اسٹیبلشمنٹ محمد شہزاد ارباب نے کہا کہ وزیراعظم کی ہدایت کے مطابق، کارکردگی کے معاہدوں پر سہ ماہی بنیادوں پر عملدرآمد کا جائزہ ٹائم لائنز کے مطابق ہونا ضروری ہے،مالی سال2020-21 کی پہلی دو سہ ماہیوں میں وزارتوں کی کارکردگی کا جائزہ جنوری کے تیسرے ہفتے میں لیا جاۓ گا۔انہوں نے کہا کہ مالی سال2020-21 کی تیسری سہ ماہی میں وزارتوں کی کارکردگی کا جائزہ اپریل کے دوسرے ہفتے میں لیا جاۓ گا جبکہ مالی سال2020-21 کی چوتھی سہ ماہی میں وزارتوں کی کارکردگی کا جائزہ جولائی کے تیسرے ہفتے میں لیا جاۓ گا۔
شہزاد ارباب نے کہا کہ وزارتوں کی کارکردگی کی سہ ماہی جائزہ رپورٹس وزیراعظم کو پیش کی جائیں گی،کارکردگی کے معاہدے اور ان کی جائزہ رپورٹس وزارتوں کو ان کے اہداف حاصل کرنے میں معاون ثابت ہوں گے۔
