اسلام آباد،31دسمبر (اے پی پی):مسلم لیگ (ن )کے اراکین قومی اسمبلی کے استفعوں کے حوالے سے سپیکر قومی اسمبلی اسد قیصر نے رولنگ دے دی ہے جس میں کہا گیا ہے کہ استعفوں کی تصدیق نہیں ہو سکی اس لئے مزید کاروائی کی ضرورت نہیں ہے۔ قومی اسمبلی سیکرٹریٹ کے مطابق مسلم لیگ ن کے اراکین قومی اسمبلی مرتضیٰ جاویدعباسی اور ڈاکٹر محمد سجاد اعوان کے استعفوں کے معاملے پر سپیکر قومی اسمبلی نے اپنی رولنگ میں کہا ہے کہ دونوں اراکین نے استعفوں کی تصدیق نہیں کی اور اراکین نے اپنے استعفوں کو جعلی قرار دیا ہے۔موصول ہونے والے استعفے متعلقہ ممبران کے ثابت نہیں ہوسکے ۔استفعوں پر کاروائی قانون ، قواعد ، گائید لائنز اور سپریم کورٹ کے فیصلے کی روشنی عمل میں لائی گئی ۔استفعوں کی تصدیق نہیں ہو سکی لہذا ان پر مزید کاروائی کی ضرورت نہیں ہے۔ واضح رہے کہ مسلم لیگ (ن) کے اراکین قومی اسمبلی مرتضیٰ جاوید اور ڈاکٹر محمد سجاد اعوان کے استعفے اُن کے سرکاری لیٹر ہیڈ پیڈ پر 14دسمبر 2020کو قومی اسمبلی سیکرٹریٹ کو موصول ہوئے تھے۔
