کوئٹہ ،31 دسمبر(اے پی پی): وزیراعلی بلوچستان جام کمال خان کی زیر صدارت سیاحت اور کلچر کے فروغ، آثار قدیمہ اور اس سے متعلق ترقیاتی سکیموں کا جائزہ اجلاس منعقد ہوا۔ اجلاس کو سیکریٹری کلچر نے بریفنگ دی سیکریٹری کلچر نے بتایا کہ صوبے میں سیاحت کے فروغ کے لیے ماسٹر پلاننگ کی جا رہی ہے گڈانی کنڈملیر، اور ماڑہ،پسنی اور گوادر میں بیچ ماڈل پارکس کے قیام اور زیارت اور وادی شعبان کی ماسٹر پلاننگ کی جا رہی ہے اجلاس سے خطاب کرتے ہوئے وزیراعلی بلوچستان جام کمال خان نے کہا کہ سیاحت کو بھرپور انداز میں اجاگر کرنے کے لئے اسے کمپنی موڈ کے طرز پر چلانے کے لیے اقدامات کئے جائیں اور ٹورزم کو فروغ دینے کے لیے ڈویژنل سطح پر دفاتر قائم کیے جائیں جبکہ بڑی شاہراہوں پرسیاحتی معلومات سے متعلق بورڈز نصب کیے جائیں صوبے میں سیاحت کے فروغ اور آثار قدیمہ کے تحفظ کے لیے اقدامات کیے جا رہے ہیں انہوں نے کہا بلوچستان میں آرٹ سے متعلق مختلف شعبوں کے مقابلوں کا انعقاد کیا جائے اور سیاحت، کلچر اور اور آرٹ کو فروغ دینے سے صوبے کا مثبت عکس اجاگر ہوگا۔ اجلاس میں چیف سیکریٹری منصوبہ بندی و ترقیات عبدالصبور کاکڑ اور سیکریٹری کلچر سمیت دیگر متعلقہ حکام نے شرکت کی ۔
