پشاور، 31دسمبر(اے پی پی): وفاقی وزیر برائے داخلہ شیخ رشید نے کہا ہے کہ ایف سی کی قربانیوں کو قوم قدر کی نگاہ سے دیکھتی ہے، محدود وسائل میں بھی امن و امان کے قیام کیلئے ایف سی کی قربانیاں اور خدمات قابل ستائش ہیں۔ یہی وجہ ہے کہ جلد ہی ایف سی شہداء پیکج میں اضافہ کیا جائیگا اور ڈیڑھ ماہ میں فرنٹیئر کانسٹبلری کے مسائل بھی حل کیے جائینگے۔
شیخ رشید احمد نے آج پشاور میں فرنٹیئر کانسٹبلری ہیڈ کوارٹر پہنچے جہاں جوانوں کے چاک و چوبند دستے نے وفاقی وزیر برائے داخلہ کو سلامی پیش کی، اسکے بعد وفاقی وزیر برائے داخلہ نے ایف سی ہیڈ کوارٹر میں یادگار شہداء پر پھول رکھے اور شہداء کی بلند درجات کیلئے دعا کی۔
اس موقع پر فرنٹیئر کےنسٹبلری کمانڈنٹ معظم جاہ انصاری نے وزیر داخلہ کو خوش آمدید کہا اور انکو ایف سی کے حوالے سے مفصل بریفنگ دیتے ہوئے کہا کہ وزیر داخلہ کی آمد سے ایف سی جوانوں کے حوصلے مزید بلند ہوئے ہیں۔
انہوں نے وزیر داخلہ کو بتایا کہ ایف سی کی 599 پلاٹون میں 27500 جوان خدمات انجام دے رہے ہیں جبکہ سندھ میں جیلوں اور فارن دفاتر کی سیکورٹی کی خدمات بھی ایف سی انجام دے رہی ہے، اسی طرح سیکشن تھری کے تحت ایف سی بارڈر اور ملحقہ علاقوں کی سیکورٹی سمیت اقتصادی راہداری، گلگت بلتستان، خیبرپختونخوا، واپڈا، سوئی گیس، این ایچ اے سمیت اقوام متحدہ میں بھی ایف سی کی مستقل نمائندگی موجود ہے۔
انہوں نے کہا کہ گزشتہ دو سالوں میں ایف سی کے 11 جوانوں نے جان کے نذرانے پیش کئے اور 27 دہشت گردوں کو واصل جہنم کیا۔
ملاقات کے دوران شیخ رشید نے ایف سی کو درپیش مسائل ترجیحی بنیادوں پر حل کرنیکی یقین دہانی کراتے ہوئے کہا کہ اپنے لہو سے امن کے دئیے جلانے والے شہداء کی یاد قوم کے دلوں میں ہمیشہ زندہ رہیگی جنھوں نے دہشت گردوں کا قلع قمع کرنے کیلئے ہر اول دستے کا کردار ادا کیا ہے۔
