اسلام آباد،3فروری (اے پی پی):وزیراعظم کامیاب جوان پروگرام اور یونیسف پاکستان کے درمیان باہمی اشتراک اور تعاون کے حوالے سے مفاہمت کی یادداشت پر دستخط کر دیئے گئے ہیں۔ وزیراعظم کے معاون خصوصی برائے امور نوجوانان عثمان ڈار اور یونیسف کی آیڈا گِرما نے معاہدے پر دستخط کیے۔کامیاب جوان پروگرام اور یونیسف کے درمیان پاکستان میں ایڈولیسنٹ ایکویلٹی انڈیکس مرتب کرنے کے حوالے سے تعاون پر اتفاق کیا گیا ہے۔
اس موقع پر وزیراعظم کے معاون خصوصی برائے امور نوجوانان عثمان ڈار نے کہا ہے کہ انڈکس کا مقصد 10 سے 19 سال عمر کے بچوں کو درپیش مسائل اور مشکلات جانچنا ہے۔انڈکس کی بدولت بچوں کو درپیش مشکلات کو مدنظر رکھ کر پالیسی سازی میں مدد حاصل ہوگی۔ انہوں نے کہا کہ یونیسف کے ساتھ ملکر وزیراعظم کامیاب جوان جونیئر پروگرام متعارف کروا کر 10 سے 19 تک کے بچوں کی فلاح و بہبود کیلئے ملکر کام کرینگے۔
یونیسف کی نمائندہ آیڈا گِرما نے کہا کہ یو نیسف ایڈولیسنٹ ایکویلٹی اینڈیکس تشکیل دینے اور متعلقہ لوگوں کو ٹرینینگ دینے کے حوالے سے تکنیکی معاونت فراہم کرے گا۔ یونیسف پاکستان میں بچوں سے متعلقہ موجودہ سوشل سیکٹر پا لیسیز کا از سر نو جائزہ لینے کیلئے بھی تعاون فراہم کرے گا۔
