پشاور،8فروری (اے پی پی):صدر مملکت ڈاکٹر عارف علوی نےخصوصی افراد کیلئے معاون ٹیکنالوجی کی اہمیت کو اجاگر کرتے ہوئے کہا ہے کہ حکومت خصوصی افراد کی فلاح اور معاشرےمیں ان کی شرکت بڑھانے کیلئے پرعزم ہے، پیشہ ورانہ تربیت اور ہنرمندی کی تعلیم دے کر خصوصی افراد کو معاشی طور پر خودمختار بنانے پر توجہ دے رہی ہے، خصوصی افراد کے حقوق ایکٹ 2020 ء سے انہیں قومی ترقی میں شامل کرنے میں مدد ملے گی۔ وہ پیر کو گورنر ہاؤس ، پشاور میں خصوصی افراد کی بہبود کے متعلق اجلاس کی صدارت کر رہے تھے۔ اجلاس میں معاونِ خصوصی صحت ڈاکٹر فیصل سلطان ، وزیرِ اعلیٰ خیبر پختونخوا، عالمی ادارہ صحت کے نمائندگان اور خصوصی افراد نےبھی شرکت کی۔ صدر مملکت کو خصوصی افراد کی فلاح و بہبود اور پاکستان میں معذوری کی ابھرتی صورتحال کے متعلق بریفنگ دی گئی۔ بریفنگ میں بتایا گیا کہ پاکستان یونیورسل ہیلتھ کوریج کا کم لاگت والا موثر پیکیج تیار کرنے والا دنیا کا پہلا ملک بن گیا ہے۔ صدر مملکت نے کہا کہ معذور افراد کی بحالی اور متعدی امراض سے بچاؤ کیلئے جدید ٹیکنالوجی کے استعمال کی ضرورت ہے۔ انہوں نے کہا کہ خصوصی افراد کیلئے معاون ٹیکنالوجی عالمی ، علاقائی اور ریاستی سطح پر مقبول ہو رہی ہے، حکومت خصوصی افراد کو ٹیکنیکل ، ووکیشنل اور ہنرمندی کی تعلیم دے کر معاشی طور پر خودمختار بنانے پر توجہ دے رہی ہے۔ صدر عارف علوی نے کہا کہ وزیر اعظم عمران خان خصوصی افراد کیلئے 2000 روپے ماہانہ وظیفہ دینے کا اعلان کر چکے ہیں، خصوصی افراد کے حقوق ایکٹ 2020 ء سے خصوصی افراد کو قومی ترقی میں شامل کرنے میں مدد ملے گی۔ انہوں نے کہا کہ حکومت خصوصی افراد کی فلاح اور معاشرےمیں ان کی شرکت بڑھانے کیلئے پرعزم ہے، خصوصی افراد کے ڈیٹا کی تیاری کے بعد انہیں آسان شرائط پر قرض فراہم کیا جائے گا۔ صدر عارف علوی نے کہا کہ پوسٹ گریجویشن کلاسوں میں داخلہ لینے والے خصوصی طلباء کو فیسوں کی معافی دی جائے گی، خصوصی طلباء کی مدد کے لئے 50،000 روپے اسکالرشپ فراہم کئے جارہے ہیں۔
