پشاور، 16فروری(اے پی پی):ضلع خیبر کے علاقہ لنڈی کوتل کی ایف سی چھاؤنی میں آج مقامی کالجز کے طلباء کے لئے آئی ایس ایس بی ٹیسٹ آگاہی کلاسز کا اہتمام کیا گیا۔
آگاہی کلاسز کے موقع پر کمانڈنٹ خیبر رائفلز کرنل رضوان نزیر 105ونگ کے کمانڈر لیفٹیننٹ کرنل مناظر منہاس. 101ونگ کے کمانڈر لیفٹیننٹ ابرار نے آئی ایس ایس بی ٹیسٹ کے حوالے سے طلباء کو آگاہی لیکچر دیا۔
اس موقع پر کمانڈنٹ خیبر رائفلز کرنل رضوان نزیر اور ونگ کمانڈر مناظر منہاس نے ISSB کلاسز کے موقع پر طلباء سے خطاب کرتے ہوئے کہا کہ قبائلی اضلاع میں پہلی مرتبہ فرنٹیئرکور نارتھ حکام کی طرف سے مزکورہ کلاسز کا اہتمام کیا گیا جس میں لنڈی کوتل کے مختلف کالجز کے 97طلباء نے کلاسز میں حصہ لیا جوکہ دو ہفتوں تک جاری رہے گا۔
کمانڈنٹ خیبر رائفلز کرنل رضوان نذیر نے کہا کہ آئی ایس ایس بی کلاسز کا بنیادی مقصد علاقے کے تعلیم یافتہ نوجوانوں کو پاک فوج میں بطور کمیشن آفیسر بھرتی میں آسانی ہوگی اور آگے جانے میں مشکل نہ ہوگی۔
کمانڈنٹ خیبر رائفلز کرنل رضوان نزیر نے کہا قبائلی اضلاع بالخصوص ضلع خیبر لنڈیکوتل کے طلباء میں بے پناہ ٹیلنٹ موجود ہے جنہوں نے ہمیشہ تعلیم کے ساتھ ساتھ کھیل کے میدان میں بھی ملک اور قوم کا نام روشن کیا ہے اس لئے ہم امید رکھتے ہیں کہ لنڈی کوتل چھاؤنی میں شروع ہونے والے آئی ایس ایس بی کلاسز سے طلباء بھرپور فائدہ حاصل کرسکیں گے اور پاک فوج میں بھرتی ہونے کے بعد ملک و قوم کی بہتر خدمت کے مواقع مل سکیں گے۔
ضلع خیبر لنڈیکوتل ایف سی چھاؤنی میں پہلی مرتبہ طلباء کے لئے آئی ایس ایس بی کلاسز شروع کرنے پر طلباء نے فرنٹیئرکور نارتھ حکام کمانڈنٹ خیبر رائفلز کرنل رضوان نزیر 105ونگ کے کمانڈر لیفٹیننٹ کرنل مناظر منہاس اور دیگر اعلیٰ حکام کا خصوصی شکریہ ادا کیا اور ان کے اس اقدام کو سراہا۔
