لاہور،17 فروری(اے پی پی):وزیراعلیٰ پنجاب سردار عثمان بزدار نے کہا ہے کہ خواتین کو بااختیار بنانا حکومت کا مشن ہے، کوئی معاشرہ خواتین کی عملی میدان میں شمولیت کے بغیر آگے نہیں بڑھ سکتا۔
ان خیالات کا اظہار وزیر اعلی پنجاب نے بدھ کو یہاں خواتین ارکان پنجاب اسمبلی سے ملاقات کے دوران کیا ، ملاقات میں فلاح عامہ کے منصوبوں، خواتین کو مزید با اختیار بنانے اور مسائل کے حل سمیت سینیٹ الیکشن کے حوالے سے بھی تبادلہ خیال کیا گیا۔
سردار عثمان بزدار نے کہا کہ خواتین ارکان اسمبلی کو ہمیشہ مشاورت میں شامل کیا ہے،ون مین شو کا قائل نہیں،ٹیم ورک پر یقین رکھتا ہوں۔انہوں نے کہا کہ خواتین ارکان صوبائی اسمبلی کو ان کا جائز حق دیں گے۔
وزیر اعلیٰ پنجاب نے کہا کہ عوام نے ملک کی ترقی کا راستہ روکنے والوں کی منفی سیاست کا راستہ روک دیا ہے، پی ڈی ایم بند گلی میں پھنس چکی ہے، استعفوں کی ناکام سیاست کے بعد لانگ مارچ کی سیاست بھی ناکام رہے گی۔انہوں نے کہا کہ مسترد شدہ عناصر عوام کو گمراہ نہیں کر سکتے ہیں،اڑھائی برس میں جو کام کئے ہیں، سابق حکمران 30 برس میں نہیں کرسکتے ہیں۔
وزیراعلیٰ سے ملاقات کرنے والوں میں سعدیہ سہیل رانا، سمیرا احمد اور رشیدہ خانم شامل تھیں جبکہ چیف وہپ پنجاب اسمبلی ایم پی اے سید عباس علی شاہ اور سیکرٹری گڈ گورننس کمیٹی کرنل (ر) اعجاز حسین منہاس بھی اس موقع پر موجود تھے۔
