لاہور،18 فروری(اے پی پی ):صوبائی وزیر قانون راجہ بشارت کی زیر صدارت پنجاب کاسمیٹکس کنٹرول بل 2021 ء پرمشاورتی اجلاس جمعرات کو یہاں منعقد ہوا،اجلاس میں سٹیک ہولڈرز کی جائز تجاویز کو مجوزہ قانونی مسودے کا حصہ بنانے کی یقین دہانی کروائی گئی۔
اجلاس سے خطاب کرتے ہوئے راجہ بشارت نے نے کہا کہ وزیراعلیٰ کی ہدایت پر کاسمیٹکس کی تیاری و فروخت قانون کے دائرے میں لارہے ہیں، کاسمیٹکس کی ریگولیشن کے لیے بہت جلد اسمبلی میں بل آرہا ہے۔انہوں نے کہا کہ اس وقت بازار میں دستیاب بعض کاسمیٹکس میں مضر صحت اجزاء کے شواہد ملے ہیں، پیسے کی آڑ میں کسی کو انسانی صحت سے کھیلنے کی اجازت نہیں دی جا سکتی ہے۔
انہوں نے مزید کہا کہ مجوزہ قانون جعلی اور مضر صحت کاسمیٹکس کی روک تھام ممکن بنائے گا۔
اس موقع پر سیکریٹری پرائمری ہیلتھ نے کہا کہ بعض رنگ گورا کرنے والی کریموں میں سیسے کی مقدار خطرناک حد تک زیادہ ہے۔انہوں نے کہا کہ کاسمیٹکس ایسوسی ایشن کے نمائندے مجوزہ قانون کے حوالے سے اپنی تجاویز بھجوائیں ۔
اجلاس میں سیکرٹری پرائمری ہیلتھ، چیف ڈرگز انسپکٹر پنجاب ، کاسمیٹکس ایسوسی ایشن کے نمائندے اور متعلقہ افسران نے بھی شرکت کی۔
