اسلام آباد۔22فروری (اے پی پی):وزیر داخلہ شیخ رشید احمد نے افغان امن عمل کیلئے بات چیت کے حوالہ سے قطر کی کاوشوں کو سراہتے ہوئے کہا ہے کہ افغانستان میں پائیدار امن پاکستان کا دیرینہ خواب ہے، پاکستان قطری حکومت کی امن کی کوششوں کو قدر کی نگاہ سے دیکھتا ہے، افغان طالبان سے مذاکرات کا عمل جاری رہنا چاہئے۔ ان خیالات کا اظہار انہوں نے قطر کے خصوصی سفیر مطلق بن ماجدالقہطانی سے گفتگو کرتے ہوئے کیا جنہوں نے پیر کو یہاں ان سے ملاقات کی۔ وزارت داخلہ سے جاری بیان کے مطابق ملاقات میں پاکستان قطر باہمی تعلقات اور افغانستان امن مذاکرات پر بات چیت کی گئی۔ وزیر داخلہ نے افغان امن ڈائیلاگ کے حوالے سے قطر کی کاوشوں کو سراہا۔ قطر کے خصوصی سفیر نے اس موقع پر کہا کہ افغانستان میں پائیدار امن کے لئے پاکستان کے ساتھ ے مل کر کوششیں کر رہے، افغانستان میں امن ،خطے کی سماجی اور معاشی ترقی کے لئے ناگزیر ہے۔ انہوں نے کہا کہ پاکستان کے سول اور فوجی اداروں نے قیام امن کے لئے بیشمار قربانیاں دی ہیں۔ وزیر داخلہ شیخ رشید احمد نے اس موقع پر گفتگو کرتے ہوئے کہا کہ پاکستان اور قطر کے درمیان تعلقات برادرانہ ہیں۔ انہوں نے کہا کہ افغانستان میں پائیدار امن پاکستان کا دیرینہ خواب ہے۔ انہوں نے کہا کہ قطر کی حکومت طالبان سے مذاکرات کے لئے جو کام کر رہی ہے وہ قابل ستائش ہے، پاکستان قطری حکومت کی امن کوششوں کو انتہائی قدر کی نگاہ سے دیکھتا ہے، پاکستان، قطر اور افغانستان کی مشترکہ کوششوں سے علاقے میں امن بہتر ہوا ہے۔ وزیر داخلہ نے کہا کہ افغان طالبان سے مذاکرات کا عمل جاری رہنا چاہئے، اسی سے پائیدار امن قائم ہوگا۔ وزیر داخلہ سے ملاقات میں قطری حکومت کے اعلیٰ حکام نے بھی شرکت کی۔ ملاقات میں پاکستان میں قطر کے سفیر اور وفاقی سیکرٹری داخلہ بھی موجود تھے۔
