اسلام آباد، 13 مارچ(اے پی پی ): پاکستان تحریک انصاف کے وائس چیئرمین مخدوم شاہ محمود قریشی سے سابق وزیر اعظم آزاد کشمیر اور پی ٹی آئی آزاد کشمیر کے صدر بیرسٹر سلطان محمود چوہدری نے ہفتہ کو یہاں ملاقات کی ،دوران ملاقات آزاد کشمیر کے آئندہ انتخابات سمیت اہم پارٹی امور پر تبادلہ خیال کیا گیا۔
بیرسٹر سلطان محمود نے آزاد کشمیر میں آئندہ انتخابات کے حوالے سے اب تک کی جانے والی تیاریوں اور پارٹی امور سے متعلقہ صورتحال سے وائس چیئرمین تحریک انصاف مخدوم شاہ محمود قریشی کو آگاہ کیا۔
وفاقی وزیر مخدوم شاہ محمود قریشی نے کہا کہ آزاد کشمیر کے آئندہ الیکشنز میں عمران خان کے نظریے پر کاربند اور اچھی شہرت کے حامل امیدواروں کو سامنے لائیں گے اور انشاء اللہ آزاد کشمیر کے عوام پی ڈی ایم کے کرپٹ اور غیر فطری اتحاد کو مسترد کریں گے۔
بیرسٹر سلطان محمود نے کہا کہ آزاد کشمیر کے آئندہ انتخابات میں پاکستان تحریک انصاف انشاء اللہ بھاری اکثریت سے کامیاب ہو گی۔
وزیر خارجہ نے واضح کیا کہ مسئلہ کشمیر پاکستان کی خارجہ پالیسی کا اہم ستون ہے، کشمیری بھائیوں کو بھارتی استبداد سے نجات دلانے اور ان کے جائز حق، حق خودارادیت کے اصول تک پاکستان ہر عالمی فورم پر ان کیلئے آواز بلند کرتا رہے گا۔انہوں نے آزاد کشمیر میں پاکستان تحریک انصاف کو متحرک بنانے کے حوالے سے بیرسٹر سلطان محمود چوہدری کی کاوشوں کو سراہا۔
بیرسٹر سلطان محمود چوہدری نے مسئلہ کشمیر کو بین الاقوامی سطح پر اجاگر کرنے سمیت اہم سفارتی کامیابیوں پر وزیر خارجہ کو مبارکباد دی۔
