اسلام آباد، 15 مارچ (اے پی پی): اسپیکر قومی اسمبلی اسد قیصر سے وزیراعظم برائے پارلیمانی امور مشیر ڈاکٹر بابر اعوان کی ملاقات ہوئی، ملاقات میں اہم قانون سازی کے عمل کو تیز کرنے پر تفصیلی تبادلہ خیال کیا گیا ہے۔
ملاقات میں آئینی اور الیکشن اصلاحات پر کمیٹی تشکیل دینے پر اتفاق کیا گیا، کمیٹی کی صدارت اسپیکر قومی اسمبلی اسد قیصر کریں گے، کمیٹی گلگت بلتستان عبوری صوبے سے متعلق آئینی اور قانونی پہلوؤں کا جائزہ لے گی۔ کمیٹی میں اپوزیشن اور حکومت کو برابر نمائندگی دی جائے گی، کمیٹی اپوزیشن کے تحفظات کا بھی تفصیلی جائزہ لے کر متفقہ لائحہ عمل مرتب کرے گی۔
کمیٹی الیکشن اصلاحات کا زیر التواء بل کا بھی ازسرنو جائزہ لے گی اور سینیٹ الیکشن سے متعلق آئین میں ترمیم کے حوالے سے اپوزیشن جماعتوں کے ساتھ مشاورت بھی کرئے گی۔
اسپیکر قومی اسمبلی نے کہا کہ سینیٹ انتخابات پر اٹھنے والے سوالات کا تدارک ناگزیر ہے، الیکٹورل ریفارمز وقت کی اہم ضرورت ہے، قانون سازی کے ذریعے اہم قانونی معاملات میں اصلاحات لائی جا سکتی ہیں، حکومت اور اپوزیشن کو قانون سازی کے ذریعے عوامی اہمیت کے اہم معاملات کو خوش اسلوبی سے حل کرنا چاہیے۔
اسپیکر قومی اسمبلی نے کہا کہ سینیٹ انتخابات میں اصلاحات نا ہونے کی وجہ سے تماشا بنا رہا، ہمیں ماضی کو بہلا کر مستقبل کے بارے میں سوچنا ہو گا۔
