اسلام آباد۔22مارچ (اے پی پی):پاکستان تحریک انصاف کے رہنما سینیٹر شبلی فراز نے 26مارچ کو مریم نواز کی نیب پیشی پر سیاسی جتھوں کے استعمال کی دھمکی کی مذمت کرتے ہوئے واضح کیا ہے کہ کسی کو قانون کی گرفت سے بچنے کے لئے پرتشدد ہتھکنڈوں کی اجازت نہیں دی جائے گی، پوری قوم دیکھ رہی ہے کہ ایک خاتون سیاسی پلیٹ فارم استعمال کرتے ہوئے جواب دینے کی بجائے ادارے پر لشکر کشی کرنے جارہی ہے، اپنے ادوار میں سپریم کورٹ پر حملوں، عدالتوں میں پیشی پرگھیرائو اور جلائو کرنے والوں کی بلیک میلنگ میں آئیں گے اور نہ ہی انھیں حکومت کوئی این آر او دے گی ، پاکستان تحریک انصاف قومی اسمبلی اور سینٹ میں سب سے بڑی جماعت بن کر ابھری ہے ، قانون سازی کا عمل تیز اور اصلاحات لائیں گے ،احتساب کا عمل ویسے نہیں ہو رہا جس طرح حکومت اور پاکستان کے عوام توقع رکھتی تھی ، پاکستان کے عوام نے ثابت کر دیا ہے کہ وہ کرپشن کو تحفظ دینے کے لئے نہیں بلکہ روکنے کے لئے باہر نکلتی ہے، براڈ شیٹ معاملے اور عدالتی فیصلے کا جائزہ لے رہے ہیں ،جلد عوام کے سامنے لائیں گے ۔ وہ پیر کو پی آئی ڈی میں پریس کانفرنس سے خطاب کر رہے تھے ۔ پی ٹی آئی کے سینیٹر شبلی فراز نے کہا کہ مریم نواز کا گذشتہ روز یوتھ کنونشن خطاب میں لب و لہجہ مایوس کن تھا ،مریم نواز کا لب و لہجہ فہم و فراست سے عاری فرد کا لگ رہا تھا ۔ انہوں نے کہا کہ فضل الرحمان نے ہمیشہ مذہب اور دین کو اپنے سیاسی مقاصد کے لئے استعمال کیا ،ان لوگوں نے سیاست کو غیرقانونی کارروبار بنا دیا ہے ، یہ مایوس عناصر اپنی سیاست میں ہر غیر قانونی کارروبار کی سرپرستی کرتے ہیں۔ انہوں نے کہا کہ مریم نواز کرپشن کی وضاحت دینے کی بجائے آئینی ادارے پر چڑھائی کی دھمکی دے رہی ہیں، یہ لوگوں کو ترغیب دے رہے ہیں کہ پہلے لوٹ مار کرو اور پھر جتھے بنا کر اداروں پر حملے کرو۔ انہوں نے کہا کہ پاکستان کے عوام یہ دیکھنا چاہتے ہیں کہ کیسے ایک سیاسی پلیٹ فارم کو استعمال کرنے والی لیڈر دھمکیاں دے رہی ہے ، زبانیں کاٹنا اور زبانیں کھینچنے کی باتیں کی گئیں ، سیاست کو غیر قانونی کاروبار بنا دیا گیا ہے، اپنے دور حکومت میں لینڈ مافیا ، ذخیرہ اندوزوں ، جرائم پیشہ عناصرکی پشست پناہی کرتے رہے ہیں ،اس کلچر کی ترجمانی کر رہے ہیں جس میں عام جرائم پیشہ لوگ سوچیں گے کہ کسی سیاسی پارٹی میں شمولیت اختیار کرو، مشکل وقت آئے تو ادراوں ،ججز پر چڑھائی کر دیں، جیلوں میں بیٹھے ہوئے لوگ بھی یہ ہی سوچ رہے ہونگے کہ عدالتوں میں پیشیوں کے موقع پر فیصلہ کرنے والوں کو ڈرائیں اور دھمکائیں ۔عوام کو بتانا چاہتے ہیں کہ یہ وہ پارٹی ہے جن کی تاریخ ، اقتدار میں عوام کے مسائل کو حل اور اداروں کو مضبوط کرنے کی بجائے سپریم کورٹ پر حملے ، عدالتوں میں پیشی پر گھیرائو جلائو کرنے کی مثالوں سے بھری پڑی ہے ۔ انہوں نے کہا کہ وزیراعظم عمران خان اس بات پر مضبوط کھڑے ہیں ملک کا مستقبل روشن اور قانون کی حکمرانی ہے ، اپوزیشن کی کرپشن ، لشکر کشی اور دھونس کی سیاست نہیں چلنے دیں گے ۔ ایک سوال کے جواب میں سینیٹر شبلی فراز نے کہا کہ 26مارچ کو کیا کیا وعدے کیے گئے ، بہت سی حکمت عملی بنائی گئیں سب کی سب خاک میں مل گئی ہیں ، انھیں ہزیمت اٹھانی پڑی ، پی ڈی ایم تو ختم ہوگئی اب ان کی سیاست بھی ختم ہونے والی ہے ۔ ایک سوال کے جواب میں انہوں نے کہا کہ وزیراعظم عمران خان اور ان کی اہلیہ کی حالت خطرے سے باہر ہے ، ہر روز ان کی صحت میں بہتری آرہی ہے ،احتیاط کے طور پر عمران خان اپنے گھر پر قرنطینہ ہو گئے ہیں ۔ایک اور سوال کے جواب میں انہوں نے کہا کہ کابینہ میں ردوبدل معمول کی چیز ہے ، پی ٹی آئی حکومت کو اڑھائی سال مکمل ہو چکے ہیں ، اپنی ٹیم کو مزید متحرک کرنے اور خاص اہداف کو حاصل کرنے کے لئے کابینہ میں ردوبدل کپتان کا استحقاق ہے ۔ایک سوال کے جواب میں انہوں نے کہا کہ عدالت کا ہر فیصلہ حکومت کو منظور ہوتا ہے ،ہم اداروں اور انکے فیصلوں کا احترام کرتے ہیں ،پچھلی دفعہ بھی نیب پیشی پر ڈرامہ کیا گیا تھا ،ان کی اس دفعہ بھی ایسی کوشش ہوگی، ہم احسن طریقے سے صورتحال سے نمٹیں گے ۔ انہوں نے کہا کہ جب سے پارٹی جوائن کی میں پارٹی کا ترجمان ہوں، آج بھی پارٹی کے ترجمان کے طور پر میڈیا کے سامنے بات کر رہا ہوں ۔انہوں نے کہاکہ ہم 26 مارچ کو سیاسی جتھوں کےاستعمال کی دھمکیوں کی مذمت کرتے ہیں ،کسی کو قانون کی گرفت سے بچنے کےلئے پرتشدد ہتھکنڈے استعمال نہیں کرنے دیں گے۔ سینیٹر شبلی فراز نے کہا کہ مریم نواز اور فضل الرحمان امن و امان کا مسئلہ پیدا کرنا چاہتے ہیں جو نہیں ہونے دیں گے۔انہوں نے کہا کہ براڈ شیٹ کے معاملے اور عدالتی فیصلے کا جائزہ لے کر چند دنوں میں عوام کوآگاہ کریں گے ۔انہوں نے کہا کہ ہم نے مہنگائی کےخلاف جہاد کرنا ہے ، قانون کی حکمرانی کو یقینی بنانا ہے ،زہرآلود ماحول کی بجائے ملکی ترقی اور عوامی خوشحالی پر توجہ مرکوز رکھنی چاہیئے۔
