اسلام آباد، 21 اپریل(اے پی پی): وزیر خارجہ شاہ محمود قریشی سے عالمی ادارہ ء صحت کے سربراہ ڈاکٹر سید جعفر حسین کی پاکستان ایمبیسی تہران میں بدھ کو ملاقات ہوئی۔ ملاقات میں کرونا عالمی وبائی چیلنج سمیت باہمی دلچسپی کے مختلف امور پر تبادلہ خیال کیا گیا۔
وزیر خارجہ شاہ محمود قریشی نے کہا کہ کرونا عالمی وبائی چیلنج سے نبرد آزما ہونے کیلئے عالمی سطح پر مشترکہ لائحہ عمل اختیار کرنے کی ضرورت ہے، کرونا وبا کے پھیلاؤ کو روکنے کیلئے عالمی ادارہ صحت کی خدمات قابل تحسین ہیں، کرونا وبا کے دوران عالمی ادارہ صحت کی طرف سے پاکستان کی معاونت کو سراہتے ہیں ۔
وزیر خارجہ نے کہا کہ پاکستان میں کرونا وبا کی تیسری لہر پہلے سے زیادہ مہلک ثابت ہو رہی ہے، محدود وسائل کے باوجود، اس وبا کے پھیلاؤ کو روکنے کے لئے سمارٹ لاک ڈاؤن سمیت مؤثر حکمت عملی اپنا رہے ہیں ، پاکستان میں کرونا سے بچاؤ کیلئے ویکسینیشن کا عمل بتدریج جاری ہے ۔انہوں نے کہا کہ پہلے مرحلے میں شعبہ طب سے وابستہ ڈاکٹرز، نرسز اور پیرا میڈیکل اسٹاف کو ویکسین کے ذریعے محفوظ بنا رہے ہیں۔
تہران میں عالمی ادارہ ء صحت کے سربراہ ڈاکٹر سید جعفر حسین نے وزیر خارجہ کا شکریہ ادا کیا اور ایران میں کرونا وبا سے نمٹنے کیلئے عالمی ادارہ صحت کی کاوشوں سے آگاہ کیا۔
ایران میں تعینات پاکستانی سفیر رحیم حیات قریشی بھی اس موقع پر موجود تھے۔
